La Pola Ḷḷena vive les fiestes de La Flor y celebra’l mercáu tradicional

Esta fin de selmana La Pola Ḷḷena ta de folixa. Celébrense les fiestes de La Flor y, per décimu añu, el Mercáu Tradicional nel barriu La Caleya, onde destaca la Nuechi Folk del sábadu colos grupos llocales La Coḷḷa Propinde y Spanta la Xente.

A les 11 hores ta prevista l’apertura del mercáu, per onde una hora depués va facer un pasucais la Banda Gaites Güestia. El Ciclu de Teatru del Tabernáculo va principiar a les 12.30 hores y a les 13 hores va procedese a la llectura del pregón. Yá pela tarde, a les 17 hores, va tener llugar el III Alcuentru Folklóricu La Flor de Ḷḷena, cola participación del Grupu de Baille Les Ayalgues d’Ayer, la Bandina-grupu baille Ruxidera (Mieres), el  Grupu Baille La Flor Xanzaina (Ḷḷena), la pareya de gaita y tambor Imanol Núñez y Daniel Valdés, la bandina tradicional l’Andecha Turcipié (Ayer) y la Banda de Gaites Güestia. Mentes, a les 18 hores, va celebrase una desfile de la mazcarada Os Reises del Valledor. La Nuechi Folk, l’eventu que más xente concentra d’esta fiesta entamada pola Xunta Cultural Rebelgu, va principiar a les 22.30 hores y nella van participar Spanta la Xente y La Coḷḷa Propinde.

El domingu’l mercáu tendrá actividá dende les 11 hores y, al meudía, va vivir una serie de perfomances n’honor al artista Nel Amaro, fináu hai agora dos años. A la mesma hora, tamién va actuar La Bandina’l Bache. Pela tarde, Radio Ḷḷena va facer un programa especial nel mercáu, a partir de les 17 hores, cuando tamién habrá güecu pa xuegos con globos y pintures, y pa una muestra de gaiteros mozos. Media hora más tarde, ta prevista l’actuación de la Flor de Xanzaina, pa les 18 hores, dar pistoletazu al concursu d’echadores de sidra. Va zarrar el mercáu, a partir de les 19.30 hores, la Nuechi de Música Popular, que va contar cola presencia de David Payares.

Actividaes nel restu del pueblu

Amás de la programación de la Xunta Cultural Rebelgu, el Conciyu de Ḷḷena tamién entama actividaes nel restu del pueblu dende güei mesmu. Asina, esta nueche va pinchar, a partir de les 22 hores, David Mallada na carpa instalada na plaza d’Alfonso X El Sabiu, mesmu llugar nel que mañana van tocar les orquestes Waykas y Bemba (23 hores). Por último, el llunes va vivise ún de los momentos más esperaos d’esta folixa ḷḷeniza cola celebración de la romería nel prau de La Flor.