La Pola Ḷḷena celebra una edición nueva del Mercáu Tradicional dientro de les fiestes de La Flor

El barriu La Caleya acueye por novenu añu’l Mercáu Tradicional que celebra Ḷḷena dientro de les siempre esperaes fiestes de La Flor. El Tríu Santos, Varela y Caleya, Duerna, Spanta la Xente y Chus Pedro son les actuaciones d’esti añu.
 
L’Asociación Juvenil Puxando pol Carru ye la encargada nesta ocasión d’entamar el mercáu tres seis ediciones nes que la Xunta Cultural Rebelgu consiguió situar esta folixa como una de les más destacaes del calendariu asturianu. Una decisión del Conciyu de Ḷḷena que nun prestó a los miembros d’esti coleutivu, que yá teníen avanzao’l programa d’esti añu, al entender que’l gobiernu municipal trataba con esta operación arrampuñar a Rebelgu la organización del certame y, al mesmu tiempu, estremar l’asocianismu ḷḷenizu.
 
Pese al cambiu, el formatu del Mercáu Tradicional sigue siendo mui asemeyáu al d’ediciones anteriores. Los puestinos con comida y artesanía van enllenar les cais de La Caleya, barriu que va ser sede d’un bon puñáu d’actividaes, con una presencia importante de la música asturiana na llingua del país. A les 11 hores ta previsto l’apertura de puertes del mercáu pa, tres un pasucais de la Banda Gaites Güestia, dar pasu a la llectura del pregón, a les 13 hores, qu’esti añu va correr a cargu del reporteru ḷḷenizu de la TPA Álex Boada. Pela tarde, dende les 17 hores, va haber actividaes pa neños y neñes, teatru costumista y, a les 18 hores, el II Alcuentru Folclóricu La Flor de Ḷḷena, cola participación de les bandes de gaites Llariegu, la Bandina’l Traste, Güestia, Les Ayalgues d'Ayer y la pareya de gaita y tambor formada por Imanol Núñez y Daniel Valdés. El Tríu Santos, Varela y Caleya (20.30 hores), Duerna (23 hores) y Spanta la Xente (00.30 hores) van pesllar la folixa del sábadu.
 
L’actividá del domingu tamién va principiar a les 11 y, pela mañana, el grupu de baille la Flor de Xanzaina va animar el mercáu. Yá de tarde va haber exhibición de deportes tradicionales a cargu de Seis Conceyos y actividaes infantiles (17 hores), y va celebrase un Festival de la Canción Asturiana, partir de les 19 hores, cola presencia de Marisa Valle Roso (voz), Celestino Rozada (voz y zanfona), Pablo Carrera (gaita) y Andresín el d’Insierto (tambor). Por último, a les 23 hores, va actuar Chus Pedro.
 
Amás del Mercáu Tradicional, La Pola Ḷḷena tamién va tener otres munches actividaes estos díes con motivu de les fiestes de La Flor, ente les que destaquen les trés verbenes que tienen llugar el vienres, sábadu y domingu. El llunes, mentes, tien llugar ún de los momentos más esperaos d’esta celebración: la romería nel prau de La Flor.