La población asturiana concéntrase n'Uviéu y Xixón

Los datos del padrón de población del 2005 espeyen una clara tendencia de la población asturiana a axuntase nel centru del país, mientres que, peles ales, l'occidente pierde población a ritmu aceleráu y l'oriente ye a caltenese. Les grandes ciudaes como Xixón y Uviéu atropen habitantes por miles mientres que los conceyos de raigón más rural presenten perdes de población porcentuales que lleguen en dellos casos a más del 3% nun añu. La sangría de población ye tamién mui acusada nes cuenques mineres, rescamplando'l casu de Mieres, que baxa más de 600 habitantes. Asturies, nel so conxuntu, gana cerca de 3.000 habitantes, pasando de 1.073.761 a 1.076.635.

El padrón del 2005 espeya la continuación de les mesmes tendencies que vienen dándose n'Asturies dende va yá bien d'años a poco que se xorrasque nos númberos. El crecimientu descomanáu de les grandes ciudaes como Xixón y Uviéu, que vieron como a lo llargo del 2004 los sos padrones xubíen hasta más del 1%, rescampla cola perda de población de los conceyos rurales y los que vivieron nel so día l'espoxigue de la minería. Mieres, Llaviana, Llangréu o Cangas del Narcea sufrieron en dellos casos perdes de población de más de mediu puntu porcentual nún solu añu, siendo asina qu'un conceyu como Mieres, qu'a primeros d'esta década protagonizare campañes desesperaes pa caltener los 50.000 habitantes, ve esa cifra alloñase cada vegada más al quedar nos 45.943 habitantes nel 2005, poco más que los 46.558 de Llangréu, l'otru gran conceyu mineru. Cangas del Narcea, cabecera de la minería del occidente y conceyu tamién de grán raigón agrícola y ganaderu, baxa de los 16.011 habitantes del 2004 a los 15.674 que rexistra nel padrón del 2005, una perda de cerca del 3% de la so población.

Los conceyos rurales del occidente y del interior tamién acusaron esta baxada progresiva de la población asturiana, que, pela contra, tiende a concentrase nes grandes ciudaes pero tamién nos conceyos de la costa, sobremanera los qu'atiesten con Xixón, siendo asina que Villaviciosa y Carreño presenten crecimientos de más de 300 habitantes caún, mientres qu'otros conceyos costeros como Llanes o Sotu'l Barcu tamién ganaron habitantes. Conceyos que se van constituyendo en cabeces de comarca como Pravia benefíciense de pequeñes xubes poblacionales que rescamplen coles baxaes de los conceyos que les arrodien, casos de Grau o Candamu nel occidente. La fastera más occidental presenta una baxada de población xeneralizada qu'afecta a tolos conceyos, incluyíos los de la costa, na que namás Navia ye a ganar un puñáu d'habitantes mientres que Valdés o Tapia pierden un númberu significativu d'ellos. L'oriente d'Asturies nel so conxuntu gana población, rescamplando les xubes de los conceyos más turísticos, los de la costa y los más orientales, casos de Llanes, Parres o Ribedeva, mientres que Nava o Piloña pierden habitantes.

Casos aparte son los d'Avilés y Siero. La tercer gran ciudá asturiana pierde habitantes en númberos absolutos, anque se trate d'una cifra mínima, pero Avilés demuestra que nun ye a atropar más población y que pierde terrén coles otres dos grandes. Mientres, el conceyu que presentó les xubes de población más espectaculares na última década sigue ensin allegase a la cifra de los 50.000 empadronaos, anque nello influye tamién la baxa tasa d'empadronamientu de llugares como La Fresneda, que tien a munchos de los sos habitantes daos d'alta n'Uviéu anque de fechu residan en Siero.

El más pequeñu de los conceyos asturianos, Yernes y Tameza, baxa tamién y pierde la raya de los 200 habitantes al quedar en 197.