La plaza del Serviciu de normalización de Cangas quedó desierta

La plaza que'l Conceyu de Cangas del Narcea tenía convocada pa facese cargu del serviciu de normalización del conceyu quedó desierta. Namás cuatro persones s'apuntaron pa participar nel exerciciu d'oposición, que se resolvió d'una manera probetaya: una persona nun llegó a presentase y namás dos pasaron el primer exerciciu, siendo incapaces de demostrar competencia pal desempeñu de la plaza nel segundu exerciciu. La necesidá de dominar la variante occidental del asturianu y l'asitiamientu xeográficu de Cangas, mui deapegada de les principales villes d'Asturies, menguaron la nómina de posibles aspirantes a una plaza qu'ufiertaba un sueldu de 688,95 euros y contratu del tipu "por obra o serviciu" tando condicionada la duración del mesmu a la subvención que concediere'l Gobiernu asturianu, anque garantizando la plaza hasta'l 31 d'avientu del 2005.

En vistes del resultáu, el Conceyu de Cangas del Narcea decidió volver a sacar a concursu la plaza. El plazu nuevu pa la solicitú de participación remata'l 6 de mayu y pa dar mayores facilidaes a candidatos que residan fuera de Cangas o que tengan otrs obligaciones, la persona que resulte contratada va poder pactar la distribución de les veiti hores selmanales de dedicación que-y correspunden en función de la so disponibilidá y de les necesidaes del serviciu.

La convocatoria empobínase a llicenciaos o diplomaos que tean en posesión del títulu d'Especialista o Espertu en Filoloxía Asturiana que da la Universidá d'Uviéu, del títulu de Llingua Asturiana pa Enseñantes de la Conseyería de Cultura o que ficieren los cursos d'aniciu, mediu y superior de l'Academia de la Llingua Asturiana. Los aspirantes han demostrar nes prebes que dominen la variante occidental del asturianu. Les bases tan nel Area de Cultura y na Oficina d'Información Xuvenil del Conceyu de Cangas del Narcea.