La plataforma pola Defensa de Turón denuncia l’abandonu del patrimoniu industrial

En xunu del 2004, la comisión estatal de Patrimoniu anunciare l'aniciu de la redacción del plan director pa declarar el valle de Turón como Bien d'Interés Cultural. Nueve meses dempués, la Plataforma Xuvenil pola Defensa de Turón denuncia la "falta de voluntá política pa poner en marcha esta declaración" y diz que "resulta tamién difícil de comprender l'abandonu en que se tienen dellos elementos importantes del nuestru patrimoniu industrial".

La organización xuvenil pon como casu d'esti abandonu la inauguración, poco enantes de les elecciones autonómiques, de les obres de reparación del castillete de madera del Pozu Espinos nun actu solemne al qu'asistió'l mesmu Tini Areces. Según la plataforma, estes instalaciones quedaron pesllaes al poco d'inaugurales y yá más nada se fizo con elles. Peor traza tien según denuncia la plataforma'l centru d'interpretación que se prometiere pal Pozu de Santa Bárbola, del que nun se sabe nada

La Plataforma Xuvenil emplaza tamién al Ayuntamientu de Mieres pa qu'adopte una posición
más dura nesti asuntu y "garantice, hasta onde-y lo permitan les sos competencies, el mayor grau de protección al patrimoniu mineru del Valle"


Turón, que desarrolló una gran actividá minera dende l'últimu terciu del sieglu XIX y hasta la crisis de los años 70, foi un gran noyu carboneru qu'apurría la so producción a Altos Hornos de Vizcaya, empresa qu'acaparaba tola producción del valle pa llevalo hasta les fábriques vasques. La desapaición de la minería arrastró con ella más de 6.000 puestos de trabayu.

Turón ye dende va poco p'acá parte del "paisaxe protexíu" de les Cuenques, reconocimientu dientro del que yá s'entamaren acciones de recuperación de patrimoniu, casu de la restauración del castillete de Pozu Espinos, únicu pola so tipoloxía, y la reconversión de parte de la caxa del tren mineru en camín andariegu. Otru de los pozos del valle, el de Santa Bárbola, más conocíu por Pozu la Rebaldana, yá ta enxertu nos catálogos oficiales de Patrimoniu Industrial.

Xunta estos dos importantes pozos, dambos de la década de 1920, esiste tamién el Pozu San José y a la entrada del valle, el Pozu Figareo, l'únicu entovía en funcionamientu y que data de 1860. Pa lo cimero del valle ta'l pueblu d'Urbiés, ún estrañu casu de poblamientu industrial nel monte asociáu a les mines del Cotu d'Urbiés, mientres que pa la parte de la Cuadriella consérvense dellos edificios como'l sanatoriu, la central térmica y delles tolves de los antiguos llavaderos, anguaño desmantelaos pa dexa-yos sitiu a los llaboratorios de Diasa. Too ello igua un conxuntu patrimonial de más de 360 elementos catalogaos que fai del valle enteru una visita bien prestosa pa deprender la historia d'Asturies más de recién. La Guerra Civil tamién dexó la so güelga nel valle, como preba la esistencia de la Fosa Común del Pozu Fortuna, onde descansen los restos de los afusilaos pola tropa nacional cuando tomaron el valle.