La plataforma opositora al embalse de Caliao va denunciar el proyectu énte la UE

Ayeri conocióse que la sociedá estatal "Aguas del Norte" convocare la licitación del estudiu d'impactu mediuambiental previu a la construcción del embalse de Caliao (Casu) la infraestructura hidráulica de mayores proporciones que se plantegare n'Asturies en munchos años y que tien en contra una oposición grande de movimientos políticos, ecoloxistes y sindicales.

La plataforma contra'l banzáu na que tan más de venti organizaciones polítiques, sindicales y ecoloxistes, ente elles CCOO, Izquierda Xunida, Bloque por Asturies, Los Verdes, Andecha Astur o Ecoloxistes n'Acción y la Coordinadora Ecoloxista asturiana, denunció que se diere esti pasu d'encargar l'estudiu ensin esperar a los estudios d'alternatives a la construcción de la infraestructura que tan faciendo la Universidá d'Uviéu por encargu de la Confederación Hidrográfica del Norte, y SADEI por encargu del consorciu del agua CADASA y la Conseyería de Mediu Ambiente.

La plataforma d'oposición al embalse de Caliao, que s'enfota en que'l Ministeriu de Mediu Ambiente nun va dar el preste pa la obra y que va declarala d'impactu ambiental negativu, diz que, de de cualquier manera, l'aniciu del trámite yá ye sida bastante pa denunciar el proyectu énte les instituciones mediuambientales de la UE, pasu qu'asegura que va dar e poques feches. La plataforma sorraya tamién el fechu de que la tramitación del embalse ta llevándose alantre ensin el preste de la Xunta del Parque Natural de Redes. Ello ye que na xunta que celebró esti día 5 d'avientu pa tratar el Plan Rector d'Usu y Xestión del Parque Natural les intervenciones de los más de los miembros de la Xunta Rectora del Parque espresáronse contra la construcción del banzáu, que rexistró tamién más de 1300 alegaciones en contra nel plazu d'alegación pública.

L'enorme impactu mediuambiental del embalse, que va somorguiar n'agua un área de gran valor natural declarada como Llugar d'Interés Comunitariu (LIC) y enxerta na Rede Natura 2000 de la Unión Europea ye ún de los argumentos d pesu de la plataforma contra l'embalse, que tamién dulda de la utilidá de la utilidá de la infraestructura, que l'anterior Gobiernu del PP llegare descartar del Plan Hidrolóxicu Nacional col preste nel so día de los grupos Socialista y d'Izquierda Unida del Congresu de los Diputaos. Na presente llexislatura, y énte l'afoguín de los socios mayoritarios de gobiernu de la FSA-PSOE, IX-BA apautare una Proposición non de llei que mandaba la realización d'un estudiu sobre los recursos hídricos, usu y xestión del agua n'Asturies y que tendría d'encamentar o non la construcción del embalse.