La Plataforma de sofitu a Cándido y Morala presenta un pidimientu d’indultu

La Plataforma contra la Represión y poles Llibertaes presentó ayeri un pidimientu d'indultu pa los sindicalistes Cándido González Carnero y Juan Manuel Martínez Morala, presos polos estrozos causaos nuna movilización del sector naval. El representante de la plataforma Miguel Angel Llana pidió-y a "una determinada autoridá" refiriéndose al Conseyeru de Xusticia Francisco Javier García Valledor que nun se faiga portavoz de los sindicalistes, y anque agradeció que dende IX se pida l'indultu, recordó que Valledor ye "parte del gobiernu que los metió presos". Ello foi que'l conseyeru de Xusticia declaró que diba pidir al ministru de Xusticia, Mariano Fernández Bermejo, l'indultu pa los dos sindicalistes de la Corriente Sindical d'Izquierdes.

El testu de pidimientu d'indultu que presentó la Plataforma, y que ye un modelu abiertu que cualquier persona interesada pue firmar y unviar, sorraya la inocencia de Cándido y Morala y afirma que "nun son persones que precisen de pagar una pena pa reinsertase na sociedá" y que, "en cuenta d'ello son xente comprometío col so tiempu, la so sociedá y los sos compañeros". La Plataforma va siguir coles sos movilizaciones pa pidir la lliberacion de los sindicalistes, con actos como una concentración que va tener llugar esti xueves énte la Xunta Xeneral del Principáu con motivu de la constitución de la mesma. La plataforma y la CSI siguen valorando la posibilidá de declarar una fuelga.