La plataforma Cellagú denuncia l'estrozu del Camín de Compostela en Salas

La plataforma de defensa del patrimoniu "Cellagú" denunció esta selmana estrozos d'importancia nel camín de Compostela a cuenta de les obres de l'autovía ente Salas y La Espina. El pueblu de Casazorrina ye'l llugar onde la plataforma qu'igüen investigadores y amantes del patrimoniu denuncia que se fexeron los estropicios, que dañaron un antiguu poblamientu medieval y parte de lo que yera talamente'l camín. Cellagú, que perita l'antigüedá del yacimientu ente los sieglos IX y XIV y que llamenta la falta sistemática que se fai del siguimientu arqueolóxicu nes obres públiques que se faen n'Asturies al empar que denuncia'l silenciu alministrativu de la Conseyería de cultura, que nun atiende los llamaos de la plataforma.

La plataforma "Cellagú" que garra'l nome del famosu castru uvieín que se sacrificó llegalmente pa consentir l'ampliación d'una cantera, ta integrada ente otros pol conocíu investigador de la etnografía y cultura popular asturianes Alberto Álvarez Peña. Esta plataforma entamó les sos actividaes denunciando la destrucción del castru del Picu'l Castiil.lu en Cabezón, conceyu de L.lena, un yacimientu catalogáu y conocíu dende últimos del sieglu XIX nel que l'asociación denuncia que s'esfarrapló dafechu tol so rexistru arqueolóxicu pa la construcción d'un depósitu d'agua. L'amenaza de les canteres sobre'l castru del Picu Mancobiu, en conceyu Parres, y sobre los Túmulos de Penousén en Salas son otros dos graves casos de "nuevos Cellagús" que la plataforma va trabayar porque nun se materialicen.

Precisamente'l castru de Cellagú foi noticia esta selmana al conocese una sentencia del Tribunal Supremu qu'obliga a la cantera de Llatores a nun tomar el llugar del castru. La sentencia llega dempués de qu'esti yá tea descatalogáu pola Conseyería de Cultura y desmontao en parte lo que queda d'elli pa treslladalo a una aula d'interpretación onde va recrease'l yacimientu. L'agrupación política Andecha Astur d'Uviéu pidió por esti motivu la dimisión de la Conseyera de cultura Ana Rosa Migoya.