La pita y los glayos

Como l'ave fénix del asturianismu, la pita de la Xunta Pola Defensa de la Llingua resurde de les sos povises pa dir al alcuentru de los políticos asturianos en protesta cívica pola oficialidá del asturianu. La última acción de la pita foi ayeri con motivu de la inauguración del remocicáu teatru filarmónica n'Uviéu. Nun conceyu ecuménicu qu'axuntó al presidente asturianu Álavarez Areces, l'alcalde uvieín Gabino de Lorenzo, el delegáu del Gobiernu Antonio Trevín y la conseyera de Cultura Ana Rosa Migoya, la pita volvió a facer actu públicu de presencia.

Anque'l presidente del executivu y la titular de cultura paecieron desentendese de la presencia del páxaru, Gabino de Lorenzo, que yá coincidió más vegaes cola pita, salió otra vuelta a la escontra d'ella y de los manifestantes que l'acompañaben, pidiendo qu'aselare l'afogante control policial al que tuvieron sometíos los simpatizantes de la Xunta. Acordies col so calter, el rexidor uvieín protagonizó la nota graciosa del momentu, y al sentir a los manifestantes la conocida conseña "tamos fartos de glayar l'asturianu llingua oficial" allegóse hasta ellos pa preguntá-yos qué si sabíen lo que yera un glayu, comentando de pasu l'alcalde como ornitólogu aficionáu qu'había "pocos glayos agora".
Ver video 1 ver video 2