La Pita Pinta Asturiana entra al catálogu oficial de races

El Boletín Oficial del Estáu asoleya güei una orde del Ministeriu d'Agricultura Pesca y Alimentación pola que s'apreba la propuesta del Gobiernu asturianu de incluyir nel Catálogu Oficial de Races de Ganáu d'España a la especie "Pita Pinta asturiana". El Gobiernu asturianu congráciase de que se dea esti reconocimientu y recuerda que con esta inclusión en catálogu oficial, Asturies enancha'l "patrimoniu xenéticu" del país, que yá cuenta coles races Asturiana de los Valles, Asturiana de la Montaña, Oveya Xalda, Cabra Bermella y l'Asturcón.

La "Pita Pinta" ye una raza de la que s'aprovechen güevos y carne, esistiendo anguaño 38 criadores y unos 500 exemplares, unes cifres qu'afalen a la recuperación d'una especie que tuvo nun tris de desapaecer y de les que ye responsable'l llabor de l'Asociación de Criadores de la Pita Pinta Asturiana, na que la iniciativa del biólogu Ángel Eguiño foi clave pa poder llegar a esti feliz momentu. Eguiño lleva, yá dende los años 80, investigando sobre esta pita rústica asturiana, un trabayu que se convirtió nun informe completu sobre l'orixe y historia de la raza, llugares onde s'alcuentra, aspectos xenéticos y descripción morfolóxica, base pa la entrada en catálogu oficial.

El Principáu d'Asturies destaca que la Conseyería de Mediu Rural y Pesca va collaborar cola Asociación de criadores, que va poco recibió una importante ayuda económica.



Nun hai referencies lliteraries nin anuncia histórica sobre l'orixe y espardimientu d'esta raza n'Asturies, pero hai grabaos d'elles n'horros de Courias (Cangas) y del Pieloro (Carreño). Los más de los piteros onde s'atoparon animales de pita pinta taben alloñaos de grandes ciudaes y separtaos dafechu de circuitos comerciales avícoles, lo qu'afayó qu'estos animales nun cruzaren con otres especies. La declaración como raza autóctona de la pita pinta tamién salva la diferencia d'Asturies con Galicia o Euskadi, que yá tienen especies avícoles reconocíes como autóctones.