La pita de la Xunta reapaeció en Candás

El presidente asturianu Vicente Álvarez Areces acudió ayeri a Candás, capital del conceyu de Carreño, onde inauguró'l nuevu edificiu polivalente de servicios sociales "Baragaña Alta". La pita de la Xunta Pola Defensa de la Llingua Asturiana, mascota reivindicativa qu'acompaña munches vegaes a los cargos públicos d'Asturies en reivindicación de la oficialidá del asturianu, fexo actu de presencia na inauguración acompañada d'un grupu de más de trenta militantes de la organización qu'arrodiaron, por espaciu de más de dos hores, l'edificiu dando voces al favor de la oficialidá del asturianu, acompañando a los militantes de la Xunta representantes d'otres movilizaciones locales carreñines, casu de la plataforma contra la privatización de Perlora, los representantes de vecinos de Xivares opuestos al desmonte de l'Altu Aboño y los vecinos de Quimarán, que protestaben contra l'ampliación de la Zona d'Actividaes Loxístiques (ZALIA) na so parroquia. Dempués de los últimos problemes de la pita y los sos siguidores coles fuerces del orden nes últimes apaiciones de la criatura, esta vegada la policía nun fexo identificaciones ente los militantes de la Xunta.