La Pita de la Xunta preséntase candidata a les elecciones na Universidá

"Nin Vázquez nin Gotor, la pita de Rector". Esta ye la conseña cola que los militantes de la Xunta Moza na Universidá d'Uviéu quieren llamar l'atención pa qu'esti xueves los profesores, personal alministrativu y sobremanera, estudiantes universitarios, llamaos a participar na primer votación al rectoráu por sufraxu universal, echen la so papeleta pola candidatura de la Pita de la Xunta, que dempués de más d'un añu tres del Presidente asturianu, quier entamar carrera política.

Evidentemente, a efectos llegales, cada votu pol páxaru mariellu va ser nulu, pero pa la Xunta cada papeleta rosa col nome de la pita pa rectora supón un auténticu "votu útil", en cuenta del votu a los dos candidatos, que nun contemplen nos sos respectivos programes midida normalizadora denguna del asturianu na vida universitaria. Pues descargar equí en formatu .pdf la papeleta pa votar a la pita, anque los militantes de la Xunta van repartir papeletes pelos campus, que yá tan estraos de cartelos llamando al "votu útil" a la pita.

Xunta la "campaña electoral" la Xunta presentó-yos a los dos candidatos y a la comunidá universitaria un decálogu coles midíes normalizadores que-y abulten más urxentes na institución. Otramiente, la otra selmana presentóse tamién un manifiestu con 200 firmes de profesores, alumnos y personal universitariu reclamándo-yos a los candidatos un compromisu col asturianu