La pita de La Xunta, en campaña

La Pita de la Xunta sigue de campaña pa les elecciones a rector d'esti xueves na Universidá d'Uviéu. Esta mañana, la candidata de la Xunta Pola Defensa de la Llingua Asturiana al rectoráu reparte propaganda nel campus de Viesques y tamién na escuela de Peritos de Xixón. Nos díes que lleva de campaña, la pita lleva repartíes cerca de 15.000 papeletes, y ayeri mesmo cruzóse colos dos candidatos oficiales, a los qu'apurrió tamién material de campaña. La presencia de la candidata mariella ye una atracción en tolos campus pelos que pasa, y allá onde apaez llama l'atención, sobremanera ente los alumnos, que dacuando hasta se retraten cola candidata.

Xunta los actos de campaña, la pita ta faciendo tamién un trabayu diplomáticu y de negociación colos dos candidatos oficiales al rectoráu. La Xunta Pola Defensa de la Llingua Asturiana ta aconceyando con Juan Vázquez y con Vicente Gotor pa presenta-yos el decálogu-programa de la candidatura de la Pita nestes elecciones. Nel decálogu, la Pita pide ente otres coses, la implantación de la llicenciatura de Filoloxía Asturiana y la titulación de Filoloxía Asturiana en Maxisteriu, un serviciu de normalización del asturianu na universidá y que la institución tenga na so imaxe corporativa un emplegu oficial billingüe del asturianu y el castellanu, facer un reglamentu internu del usu del asturianu na Universidá d'Uviéu y, nel tema de la investigación, facer una llinia d'ayudes específiques pa la difusión n'asturianu, lo mesmo en tesis, trabayos, ponencies, investigaciones o conferencies.

Ello ye que según pudo saber Asturies.com, les negociaciones colos rectorables tan frutiando y ún d'ellos, Vicente Gotor, mandó esta mañana una carta diciendo-y a la Xunta qu'acepta siete de los puntos del decálogu. Sicasí hai trés puntos qu'amás son los más importantes, casu del Serviciu de Normalización, que siguen negociándose. D'otra manera, el gabinete electoral de la Pita de la Xunta tamién anda en tratos con Juan Vázquez, l'actual rector, que de momentu nun se comprometió col decálogu, nin enteru nin en parte, pero col que va falase hasta l'últimu momentu. Según la Xunta, la pita namás se retiraría de la campaña en casu de qu'un o los dos candidatos aceptaren dafechu'l decálogu. Si namás acepta ún de los dos candidatos, la Xunta va pidir que nun se vote al otru, mientres que si acepten los dos, la Xunta nun encamentaría preferencia de votu.

Otramiente, dende les instituciones tamién ta falándose colos candidatos a rector sobre la normalización del asturianu na vida universitaria. El Director de Política Llingüística, Ramón d'Andrés entrevistóse la otra selmana con Gotor y con Vázquez pa espone-yos los sos criterios nesti sentíu, recibiendo una actitú positiva per parte de dambos candidatos