La páxina del Museo Etnográfico de Grandas de Salime estrena versión en gallego-asturiano

Pue consultase tamién en castellanu y inglés.

El Museo Etnográfico de Grandas de Salime 'Pepe el Ferreiro' ta acabante de dar el pasu de dotar una versión en gallego-asturiano a la so páxina web. Pa ello contó cola collaboración de la Direición Xeneral de Política Llingüística, que trató d'axustase a la fala del llugar.

Tán disponibles baxo la etiqueta 'eonaviego' tolos conteníos estáticos, polo que'l visitante va poder conocer dende'l so llar toles partes de la instalación xunto con una descripción de caúna d'elles, dende'l cabanón d'entrada hasta la capiella, pasando pela casa rectoral, la fábrica de gaseoses, el pozu,  l'horru, el molín o la casa del molineru. Tamién ta na llingua del occidente tolos datos correspondientes a horarios y tipos de visites, amás de la estaya que da a conocer el llabor del área de conservación del muséu.