La partida pal caltenimientu de les races autóctones va ser de 1,2 millones nesti 2016

María Jesús Álvarez anunciólo mientres el XXIX Concursu y Puya de la Raza Asturiana del Monte celebráu'l domingu n'El Campu.

La Conseyería de Desarrollu Rural y Recursos Naturales va destinar anguaño una partida de 1.235.000 euros n'ayudes pal caltenimientu de races de ganáu autóctones al traviés de convenios de collaboración coles asociaciones que velen pola so meyora y que tienen como oxetivu aumentar la so calidá xenética y el númberu d'animales. Álvarez valoró'l trabayu desenvueltu mientres los últimos años polos criadores de la raza Asturiana del Monte, tamién denominada casina, que pasó de tar en peligru de desaniciu a cuntar con una presencia importante nel territoriu, sobre manera na zona oriental y nos montes del área central.

La titular de Desarrollu Rural destacó que cuasi 21.000 animales figuraben inscritos nel llibru xenealóxicu Asturiana del Monte, “lo que pon de manifiestu que l'esfuerciu de los criadores, col sofitu del Principáu, ta dando resultaos na recuperación d'un animal mui adaptáu al terrén y con característiques singulares que, amás, forma parte de la IXP Ternera Asturiana”. Según los datos facilitaos pola conseyera, l'Asociación Española de Criadores de Ganáu Vacuno Selectu de Raza Asturiana del Monte (Aseamo) va recibir anguaño 138.448 euros de subvención pal caltenimientu del llibru xenealóxicu y el desenvolvimientu del programa de caltenimientu de dicha raza, una vegada firmáu'l conveniu correspondiente.

Amás, Desenvolvimientu Rural prevé conceder 479.513 euros a l'Asociación Española de Criadores de Ganado Vacuno Selecto de Raza Asturiana de los Valles (ASEAVA); 29.733 euros a l'Asociación de Criadores d’Oveya Xalda d'Asturies (Acoxa), y otros 114.973 euros a l'Asociación de Criadores de Ponis de Raza Asturcón (Acpra). Van firmase tamién convenios cola Asociación de Criadores de Gochu Asturcelta (ACGA) por un importe de 15.337 euros; cola Asociación de Criadores de Cabra Bermeya (Acriber), por 17.827 euros, y cola Asociación de Criadores de Pita Pinta Asturiana (ACPPA), por 4.169 euros más, cola mira de caltener el llibru xenealóxicu de caúna de les trés races y el desenvolvimientu del programa de caltenimientu de les mesmes.

Álvarez felicitó a los profesionales del campu nel país pol so llabor pa consiguir que nun se pierda “una riqueza xenética patrimonial propia y llograr, coles mesmes, estándares de calidá bien altos nes producciones”.

Según destacó, “la recuperación y caltenimientu d'estes races autóctones contribuye tamién a la necesaria diversificación de les esplotaciones agraries y a crear riqueza y empléu nel mediu rural”.

Tamién pa la meyora xenética de la raza frisona

El Gobiernu autonómicu tamién va soscribir otru alcuerdu de collaboración cola Cooperativa Asturiana de Control Llecheru (Ascol) pal desenvolvimientu d'un programa de la meyora xenética de la cabaña ganadera asturiana de raza frisona, que va recibir una subvención de 435.000 euros.