La Oveya xalda entra nel catálogu de la “slow food”

Los criadores de la raza autóctona asturiana d'oveya, la oveya xalda celebraron esti fin de selmana la so fiesta añal n'Argüeru (Villaviciosa), cola novedá del inxerimientu de la carne d'esta especie na rede de "slow food" una asociación que se define como la opposición a la comida rápido o "fast food" y que defende'l consumu d'alimentos de calidá producíos dende'l respetu al mediu ambiente.

El coordinador de Slow Food n'España, Germán Arrien, emponderó la recuperación de la Xalda, entamada a primeros de los 90 pola asociación de criadores que tien anguaño más de 130 socios, como "un procesu exemplar de recuperación d'una raza tradicional" sorrayando qu'esi procesu llevóse alantre "ensin demasiada ayuda de les instituciones".



L'añu pasáu, Slow Food reconociere a la escanda como ún de los sos productos recomendaos, ello dempués de pasar per un comité d'espertos de quince países, un procesu d'esbilla mui analíticu que tamién podría pasar d'equí a poco la carne de Gochu Celta, otra especie en peligru de desaniciase que ta garrando fuerza gracies a la so asociación de criadores.