La OTAN augura que la so misión en Libia va acabar “pronto”

Anders Fogh Rasmussen, secretariu xeneral de la OTAN, señaló esti llunes que la misión en Libia va acabar “pronto”. La intención de l'Alianza ye abandonar el país cuando’l Conseyu Nacional de Transición (CNT) pueda controlar la seguridá.
 
“La OTAN y los nuesos socios vamos tar el tiempu que sía necesario, nin un minutu más. Cuando evaluemos que l'amenaza acabó pa siempre vamos acabar la misión”, esplicó Rasmussen en rueda prensa en Bruxeles tres una entruga sobre en cuánto tiempu podría poner fin la Organización del Tratáu Atlánticu Norte (OTAN) la so misión militar teniendo en cuenta que los rebeldes controlen yá la mayor parte del país. “Sobre'l final de la nuesa operación en Libia, la posible captura de Gadafi nun ye un factor decisivu. Los individuos, incluyíu Gadafi, nun son un oxetivu de la nuesa operación. Lo que va tener un papel crucial –pa decidir poner fin a la misión militar– ye la capacidá del Conseyu de Transición Nacional de garantizar la proteición eficaz de la población civil. Esto ye la clave, na nuesa opinión”, prosiguió.
 
Rasmussen insistió en que naide pue dar “una fecha precisa” pa poner fin a les operaciones de bombardéu aliáu nel país, anque señaló que “creo que va asoceder pronto”. El secretariu xeneral aliáu xustificó siguir cola misión militar porque l'amenaza del réxime nun cesó. “Vimos que les fuerces de Gadafi tovía constitúin una amenaza pa la población civil en Libia, y ésta ye la razón pola que tenemos que siguir cola nuesa operación  hasta qu'estes amenaces yá nun esistan”, xustificó. “Tamos en Libia pa protexer a los civiles de cualquier ataque”, continuó.
 
Por último, dexó claro que la decisión de poner fin a la misión militar, qu'acaba'l 27 de setiembre próximu tres prorrogase mientres 90 díes más, va ser del Conseyu del Atlánticu Norte, órganu de decisión máximu de l'Alianza. Ésti, añadió, va tomar “la so decisión” en base a una evaluación apropiada de los encamientos de les autoridaes militares aliaes y les capacidaes de la CNT, al tiempu qu'insistió en que los rebeldes “nun constitúin una amenaza pa la población civil”.