La Organización Contra la Tortura pide una investigación sobre'l Sáh.ara

|

La Organización Mundial Contra la Tortura (OMCT) reclamó a Marruecos que lleve a cabu una investigación "detallada y tresparente" sobre los "los graves fechos asocedíos nel campamentu Agdeim Izik y darréu na ciudá de L’Ayún".

Coles mesmes, denunció que "l'ausencia de llibertá de la prensa" y d'observadores "internacionales" contribuyó a que dende Marruecos namás se publiquen les informaciones que muestren "la culpabilidá del pueblu sah.arianu".
  
Nun comunicáu publicáu esti fin de selmana, la organización aseguró que, mientres la intervención del Exércitu y la Policía marroquines nel campamentu, utilizáronse "gases llarimosos, armes de fueu y agua a presión", lo que "provocó enfrentamientos que causaron delles víctimes ente los manifestantes sah.arianos y los axentes marroquinos".
  
"De siguío, los enfrentamientos desplazáronse a L’Ayún, onde los sah.arianos salieron a la cai pa mostrar el so refugu al esmantelamientu del campamentu, produciendo otres decenes de firíos de diversa gravedá y dellos muertos, ente ellos, según les denuncies, un neñu de siete año d'edá, muertu nel barriu de Duerat", añadió.
  
Según la OMCT, "mientres les intervenciones policiales produxéronse innumberables detenciones de sah.arianos", dellos de los que, según les denuncies que llegaron a la organización, "sufrieron golpes mientres l'arrestu y dempués, mientres taben en detención". Amás, "les persones que siguen deteníes nun pudieron alcontrase colos sos abogaos nin colos sos familiares".
  
Por ello, la organización encamentó a les autoridaes marroquines que "garanticen la integridá física y psicolóxica d'estes persones en toes circunstancies, a poner fin a los abusos, incluyíos los actos de tortura y malos tratos", y a garantiza-yos un xuiciu xustu en casu de que los detenga con cargos llegales válidos.

Llibertá de prensa
Pa la OMCT, prosigue'l comunicáu, "tamién ye bien preocupante l'ausencia de llibertá de prensa pa cubrir los fechos y informar a la opinión pública".
  
Nesti sen, llamentó'l vetu de les fuerces de seguridá marroquines a los miembros de dellos medios y a "observadores internacionales". También se critica "l'espardimientu d'informaciones confuses y vagues sobre la situación, nes que, amás, namás muéstrase la culpabilidá del pueblu sah.arianu nos fechos".
  
Por ello, la OMCT solicita a les autoridaes de Marruecos qu'acepten l'envíu d'una misión d'investigación conxunta al Sáh.ara Occidental na que participen los espertos de Naciones Uníes, "en particular sobre execuciones estraxudiciales, sumaries o arbitraries, tortura, detención arbitraria y llibertá d'espresión".
  
A lo último, la OMCT llamenta, "una vez más", que nun s'incluyó nenguna provisión sobre Derechos Humanos nel mandatu de la Misión de les Naciones Uníes pal referendu del Sáh.ara Occidental (Minurso) "cuando ésti se reconduxo n'abril del 2010".
 

Contador Estadistiques