La oposición xune les sos fuercies pa quitar al Gobiernu'l control sobre les decisiones económiques

PSOE, PP y IX-LV quieren arrebatar al Gobiernu’l control sobre les decisiones económiques y les relatives al seutor públicu. Los trés grupos presentaron una moción de llei pa camudar el testu refundíu del Rexime Económicu Presupuestariu.
 
Según indicaron en rueda prensa los voceros de les trés formaciones, que tienen mayoría na Cámara asturiana, esta decisión tómase depués de que l'Executivu dixera que fadría casu omisu a la moción parllamentaria presentada pola oposición p'anular l'acuerdu del Conseyu de Gobiernu del 4 d'ochobre, nel que s'incluyíen les retenciones de creitu al ente públicu de comunicación RTPA. Asina, el socialista Fernando Lastra esplicó que los trés grupos parllamentarios entienden necesario retirar la facultá concedida al Executivu p'actuar por sí mesmos no referente a la reordenación de les empreses públiques y el gastu públicu, dao que "nun-y ta dando un usu adecuáu". D'esta manera, la Xunta Xeneral volverá a recuperar les sos competencies "con tola dureza de la llei", dao que "yera obligao actuar ante la situación actual", dixo.
 
Pela so parte, la popular Isabel Pérez-Espinosa calcó en que "nengún Executivu pue actuar d'espaldes a la Cámara", dao que "nun pue refugase'l control parllamentariu". Por eso, reprochó l'actitú del Gobiernu de Francisco Álvarez-Cascos que, pese a tar en minoría parllamentaria, "pretende actuar ensin dar esplicaciones". "Si nun acepta la orientación del parllamentu, va tener que facelo por llei", reseñó. Por último, Jesús Iglesias argumentó que la decisión ye "esceicional" porque l'Executivu dixo "que va inorar les decisiones de la mayoría parllamentaria". "El Gobiernu anunció que va usar la desllegalizacion, non pa meyorar el sector públicu, sinón pa cortalo en secu", añadió.
 
Los voceros afirmaron que pue dexase ensin efeutu un alcuerdu del Conseyu de Gobiernu con calter retroactivu. "Va tener que paralizalo, presentar otra propuesta d'axuste y llevala ante la Cámara", apuntó Lastra, comentando que nun s'evita al Executivu reorganizar el sector públicu, sinón que se faiga en sede parllamentaria y col apoyu de la mayoría, igual que los topes de gastu. "Esto tien que ver cola tresparencia", defendieron los voceros, que criticaron les formes nes que'l Gobiernu autonómicu realizó los axustes del gastu, les retenciones de creitu a la RTPA y l'anunciu de la venta de la empresa pública Sedes.
 
Cambios
 
Con esta proposición de llei, qu'esperen debatir lo antes posible, va modificase l'artículu 'Materies de reserva llegal', pasando a indicar que va ser necesaria "l'autorización al Conseyu de Gobiernu pa la constitución d'empreses públiques del Gobiernu asturianu, asina como pal cambiu, absorción, segregación, fusión o supresión de les esistentes, y pa los actos de compra o perda de la so posición mayoritaria". De la mesma manera, añadió una nueva lletra al artículu sobre 'Competencies del Conseyu de Gobiernu', apuntando que va tener que "proponer a la Xunta Xeneral les restricciones de gastu públicu nes tresferencies a los organismos y entes públicos".
 
Tamién va modificase l'articulu relativu a les ‘Obligaciones económiques del Gobiernu d'Asturies', indicando que "les tresferencies nominatives a los organismos y entes públicos van llibrase por doceaves partes del creitu total, ensin perxuiciu de los alcuerdos de restricción de gastu públicu que'l Plenu de la Xunta pudiera adoptar a propuesta motivada del Conseyu de Gobiernu, que tendrá qu'acreditar les circunstancies que xustifiquen o aconseyen esa restricción, según la so cuantía". Amás, añadióse un apartáu nuevu a la disposición adicional segunda, 'Organismu y entes públicos suxetos al réxime de contabilidá privada y empreses públiques que reciben tresferencies corrientes de l'Alministración del Principáu'. Asina, apúntase que lo señalao nos apartaos anteriores va entendese ensin perxuiciu de los alcuerdos de restricción del gastu públicu que'l Plenu de la Xunta, a propuesta del Conseyu de Gobiernu y nos términos de lo dispuesto nesta Llei, pudiera adoptar.
 
Con too, el Conseyu de Gobiernu tendrá que dexar sin efeutu l'alcuerdu del 4 d'ochobre del 2011 sobre la necesidá d'establecer retenciones de creitu nos Presupuestos Xenerales del Gobiernu d'Asturies pal 2011, asina como cuantos otros d'asemeyada o análoga naturaleza pudiera adoptase, de lo que va dase cuenta a la Xunta Xeneral nel plazu de 15 díes dende la entrada en vixencia de la Llei, al otru día de la so publicación nel BOPA.