La oposición mantién la decisión de recuperar el control parllamentariu nel tema económicu

La Xunta Xeneral decidió continuar alantre, gracies a los votos de la oposición, cola reforma del testu refundíu del Réxime Económicu y Presupuestariu. Con ello pretende recuperar el control parllamentariu sobre les polítiques económiques.
 
El Plenu mantién esta modificación que permite que la Xunta Xeneral pueda controlar les polítiques presupuestaries del Gobiernu no relativo a les decisiones económiques y de xestión del sector públicu tres una votación na que nun tuvo presente’l presidente del país, Francisco Álvarez-Cascos. El popular Joaquín Arestegui señaló na so intervención que ye fundamental nesti momentu "devolver el control al Parllamentu pa facer les coses bien, de manera adecuada y dialogando”, pa depués apostar pola incorporación de la xestión privada pa facer que’l sector públicu "funcione bien" y "meyore la so xestión", pero en nengún casu para que "desapaeza". Por ello, reconoció que nun va poner obstáculos pa reordenar el sector públicu, pero "si se fai bien". "Si tienen un plan, tráiganlo equí y busquen l’alcuerdu p’algamar los votos necesarios", propunxo al Gobiernu d’Álvarez-Cascos.
 
Pela so parte, el socialista Fernando Lastra recordó que la proposición presentóse depués de que l’Executivu nun fixera casu a la petición de la Cámara de que nun siguiera alantre col alcuerdo del Conseyu del Gobiernu pa la contención del gastu por importe de 156,8 millones, nel que s’incluyíen les retenciones de creitu al ente públicu de comunicación RTPA. “Nun pueden facer lo que tán faciendo Si tienen proyeutu pal ente, preséntenlo y busquen apoyos pa la so aprobación, pero mentanto cumplan la llei", esixó.
 
Dende IX-LV, Jesús Iglesias reconoció que se trata d’una iniciativa "estraordinaria" que respuende "a una actuación ensin precedentes del Gobiernu autonómicu" pola so voluntá de rebeldía contra’l pidimientu de la mayoría de la Cámara. "El Gobiernu nun ta pencima del Parllamentu", remarcó apuntando que l’Executivo d’Álvarez-Cascos cometió "un fraude político y un fraude de llei".
 
Por contra, la diputada de FAC, Lilián Fernández, insistió na necesidá de controlar el déficit públicu y garantizar la estabilidá presupuestaria. Al respeuto, defendió que "la iniciativa presupuestaria compete al Gobierno y non a la Cámara", polo que refuga que se pretenda "vaciar de competencies" al Executivu. "Lo que yera bono pa vustedes enantes, agora nun-yos sirve pa que’l Gobiernu de Foro actúe y faen un usu irracional de la llegalidá pa impedir la aición de gobiernu de Foro", reprochó.
 
Contra la violencia de xéneru
 
La sesión plenaria de güei principió con una referencia del presidente de la Xunta, Fernando Goñi, a una declaración institucional alcordada por los grupos parllamentarios pa facer un llamamientu a "la rebelión coleutiva de la ciudadanía" contra la violencia hacia les muyeres con motivu del 'Día Internacional contra la Violencia de Xéneru'.