La OPEP baxa la producción de petroleu

La Organización de Países Esportadores de petroleu (OPEP) ta acabante de dar anuncia d'una importante cayida na producción de petroleu. Dende xineru del añu qu'entra van producise ventisiete millones de barriles menos al día. Dientro d'esti alcuerdu ente los países productores, tolos países miembros de la organización sacantes Irán, Indonesia y Venezuela van baxar la so producción col oxetivu de tirar p'arriba pel preciu del oru prieto. Según la OPEP anguaño la ufierta de petroleu ye mayor que la demanda polo que'l preciu ya lleva delles selmanes de cayíes nos mercaos de materies primes. Anque la OPEP siempre fizo un apueste oficial por caltener los precios ente los 22 y 28 dólares la realidá ye mui estremada. El casu ye que según estos países l'ablúcante cayida del dólar pon-yos un escenariu bien complicáu polo qu'agora'l so apueste ye algamar un rangu de precios ente los 30 y 38 dólares barril. La otra selmana'l barril Brent asitióse mui cerca de los 40 dólares.

Na bolsa, selmana d'estadístiques colos datos franceses de protagonistes. Asina, la balanza comercial de Francia nel mes d'ochobre foi de 2.068 millones d'euros, meyor de lo estimao. Ensin cambeos l'IPC francés mentanto que la producción industrial tuvo una cayida del 0,7%. El datu del PIB d'Italia foi d'una xuba del 0,4%. Al otru llau del Atlánticu los precios de producción de payares medraron un 0,5%, más de lo esperao.

Selmana tranquila na renta variable con bon ánimu inversor y pieslles en positivo. La comunidá inversora ya tien puestos los güeyos nun pieslle bursátil 2004 qu'a lo menos paez ilusionante. Nel Vieyu Continente les bolses tuvieron una selmana de xubes colos índices de París, Francfurt y Llondres con xubes ente'l 0,12% y 0,58% el vienres pasáu. En Wall Street tuvo una selmana de más a menos con un pieslle'l vienres pasáu bien feble. Asina l'índiz Dow Jones trancó nos 10.543,22 puntos lo que supón una cayida del 0,09%. El tecnolóxicu Nasdaq algamó los 2.128,07, una cayida del 0,04%.

Nuevu máximu del Ibex-35 que ta asitiao nos 8.827,20 puntos. El selectivu Ibex medró un 0,45% nel conxuntu la selmana con un volume de negociu de 1.942 millones d'euros. Ente los valores que más ganaron destaquen Telefónica, Enagás, Altadis, Rede Eléctrica, Arcelor y Endesa. Zeltia foi'l valor que peor comportamientu tuvo. L'anuncia de la selmana foi el ruxe-ruxe alrodiu la esclusión de bolsa de Telefónica Móviles por parte de la matriz. L'anuncia de que la operadora principal d'Italia vaya a sacar de bolsa la so filial de móviles pue ser un adelantu de lo que vaya a dase na Bolsa de Madrid. El casu ye que Telefónica Móviles tuvo una xuba penriba'l 5% y superando los 9 euros aición, pero tovía lloñe de los 11 euros colos que salío la OPV de la compañía nos tiempos en que Villalonga yera'l presidente toupoderosu de Telefónica.

L'euru tuvo una selmana de reaxuste técnicu énte la recuperanza del dólar. La feble economía europea dexó marxe a la divisa norteamericana pa que'l cambéu col euru algamase los 1,3231 unidaes por euru. La divisa xaponesa, el yen, tamién dio-y un respiru al dólar algamando los 105,50 yenes unidá. Nel mercáu de renta fixo'l bund alemán tuvo una cayida na so rentabilidá hasta'l 3,604%. Otramiente, el metal mariello tuvo una selmana a la baxa pola xuba del dólar. Asina l'oru asitiose nos 434,9 dólares la onza.