La ONU alvierte de “cambeos ensin torna posible” nel mediu ambiente

Tres del avisu que diere l'Analís Pilotu de los Ecosistemes del Mileniu n'España, la ONU dio a conocer ayeri un informe sobre la evolución a lo llargo del últimu mileniu de los ecosistemes del planeta. Esti informe, ellaboráu a lo llargo de cuatro años por más de1.300 espertos en 95 países que da anuncies entovía más negatives sobre l'estáu de conservación de la naturaleza.

L'informe de la ONU diz que'l 60% de los servicios de los ecosistemes que faen posible la vida na Tierra tan consumiéndose o emplegándose de manera non sostenible, y esti réxime de desgaste lleva tola traza de caltenese o de dir a mas d'equí nos próximos 50 años. La conclusión del informe ye clara, y ye que l'actividá humana tien degradao de forma "irremediable" el mediu ambiente, esistiendo un riesgu real de que la capacidá del planeta para rexenerar recursos naturales sía insuficiente p'atender a les futures xeneraciones.

Ente los cambeos que pue traer según la ONU esti nuevu marcu de cambéu climáticu ta l'apaición d'enfermedaes nueves, alteraciones na calidá del agua, l'esfarraple de los bancos de pesca y cambeos nos ecosistemes rexonales del mundu de graves consecuencies Los espertos de la ONU concueyen en que'l ritmu de les modificaciones nos ecosistemes vien acelerándose como nunca lo ficiere enantes, de va cincuenta años p'acá, alteriando la mano humana l'equilibriu natural pa satisfacer les sos demandes d'alimentu, agua, madera, freba y combustible, marcando la II Guerra Mundial una raya qu'asitia un "enantes" y un "dempués" clarísimu.

El pilotu de l'alarma yá ta prendíu según la ONU no que cinca a reserves d'agua potable y pescáu, que nel planeta yá tan perbaxo de los niveles necesarios p'atender la demanda presente "y muncho menos la futura". La perda de biodiversidá ye otra de les consecuencies más graves, tando ente'l 10% y el 30% de los mamíferos, aves y anfibios baxo amenaza de desanicie.
Ver equí l'informe