La OK Lliga va tener dos equipos asturianos tres l'ascensu en La Felguera del CP Cuencas Mineras

Nino revoluciona'l partíu en 30 minutos pa dar la victoria al Elche col Sporting B na llucha por xubir a Segunda A. L'UP Langreo pierde tamién nel tramu final del partíu col Náxara.

L'Hostelcur Xixón nun va tar solu la temporada que vien na OK Lliga femenina de ḥoquei sobre patinos. En namái cuatro años de vida, el Club Patín Cuencas Mineras consigue dar el saltu a la máxima categoría estatal, na qu'Asturies va tener dos representantes.

El conxuntu dirixíu por Carlos García Villamil, carauterizáu pola mocedá de les sos xugadores, consiguió la fazaña esta fin de selmana na fase d'ascensu celebrada en La Felguera col Liceo y el Diver Patín Berenguela como rivales. Les asturianes vencieron a les coruñeses por 1-5, pero foron quien a superar a les santiagueses por 6-3, consiguiendo asina esti históricu ascensu.

Vuelta en Mareo

Na segunda ronda de les eliminatories d'ascensu a Segunda División A, el Sporting B traxo una inxusta derrota d'Elx. Los de José Alberto foron superiores al Elche, que namái vio dalgo de lluz cola salida de veteranu goliador Nino cuando restaben 30 minutos pal final.

El de Vera anotaba l'empate nel minutu 76, igualando'l tanto inicial de Cristian Salvador nuna primera parte nel que'l Sporting B foi mui superior al rival. El gol metió a los de Pacheta nel partíu y, nel 92, un centru dende la derecha rematólu de cabeza Nino pa poner un 2-1 que, sicasí, dexa la eliminatoria abierta pa la vuelta.

El choque va disputase finalmente en Mareo por mor de la cuarta posición definitiva del primer equipu al perder por 3-0 el sábadu en Córdoba, lo qu'obliga al Sporting a xugar la vuelta de la primer eliminatoria pol ascensu a Primera, col Valladolid como rival, el domingu a les 20.30 hores. L'horariu afitáu pola televisión pa la vuelta del filial roxiblancu ye'l domingu a les 16 hores.

Eliminatoria abierta

L'Unión tamién vio como nel tramu final el so rival, el Náxara, remontaba un partíu nel que tomaba ventaya nel marcador. Los llangreanos, que disputen la segunda ronda de les eliminatories pol ascensu a Segunda División B, adelantáronse nel minutu 19 gracies a un gol d'Aimar Gulín, pero los rioxanos consiguíen empatar nel 40 por un penalti tresformáu por Emilio.

Nun se movería más el marcador hasta'l 89, cuando Javi Orodea remataba un centru dende la izquierda de Rojo. El 2-1 en La Salera dexa tamién el crucie abiertu, que va decidise'l domingu a les 17 hores en Ganzábal.