La Oficina de la Llingua de Xixón presenta materiales didácticos pa en clase

El vienres 8 de xunu, a les 13:00 hores, na Sala de recepciones de la Casa Conceyu de Xixón va facese la presentación de los materiales didácticos ganadores del concursu "Vas velo, trebeyos pal aula" organizáu pola Oficina Municipal de la Llingua de Xixón y nel que participaron los Institutos d'Enseñanza Secundaria del conceyu.
Esti concursu, que se fizo por primer vegada nesti cursu escolar 2006-2007, consistió na preparación de materiales escolares pa trabayar la llingua asturiana nel aula.

Al certame presentáronse mozos y moces de dellos institutos de la ciudá y el premiu consistió nun intercambiu cultural col conceyu de Miranda do Douro pa la clase ganadora y la publicación de los meyores trabayos. Los dos xuegos que quedaron ganadores ex-aequo fueron: "El xuegu de la Llingua" del Institutu Emilio Alarcos y "De coríu en coríu y el tiru ye míu" del Institutu Doña Ximena. La Oficina Municipal de la Llingua editó los dos xuegos ganadores con procuru, cola idea de ufiertalos a los Institutos de Xixón y que seyan un preséu más pa usar la llingua nes clases.


Nel actu van participar la Conceyala en funciones d'Educación y Promoción del asturianu Carmen Rúa xunto col profesoráu de los Institutos ganadores Beatriz Quintela y Mª Paz Fonticiella, los alumnos y les alumnes de los dos Institutos y la Responsable de la Oficina Municipal de la Llingua, Mª Xosé Rodríguez López.