La Oficina de la Llingua de Xixón, contenta cola campaña nel comerciu

La campaña de normalización y promoción del asturianu dirixida al comerciu qu'entamare esti mes de payares la Oficina de la Llingua ta rexistrando una aceptación mui alta ente los comerciantes de la villa de Xovellanos, sigún los responsables de normalización de Xixón. Col eslogan Nel comerciu asturianu yes bienveníu/ida, la campaña apurrió-yos un material variáu a los comerciantes que, al empar, van dir distribuyendo a los consumidores que s'averen y merquen nel so comerciu.

La campaña contó con una fase d'información directa a los comercios tres de la que munchos de los propios comerciantes punxéronse en contautu cola Oficina pa solicitar el material que-yos abultaba más afayadizu acordies coles característiques del so negociu. Sigún los datos de siguimientu de la Oficina que dirixe María Xosé Rodríguez, el sector mayoritariu que solicitó'l material ye,hasta agora, el rellacionáu cola moda, complementos y regalos. Tres d'ellos tán merceríes, comestibles, floristeríes y n'últimu términu, pescaderíes, ello amás de casos aisllaos como un comerciu del sector de la lletricidá y otru del agrícola.

Les zones per onde se distribuyó'l material son representatives de lo que ye la ciudá de Xixón: El Centro, El Llano, L'Arena, Pumarín, El Coto y La Calzada. La Oficina de la Llingua sorraya que la campaña ta teniendo mui bona acoyida, lo que demuestra la sensibilidá del pequeñu comerciante pa cola llingua asturiana. El material más demandáu son les bolses, pero sigún comentaron a Asturies.com dende la oficina de normalización de Xixón "lo que más ta prestando de toes toes son les pegatines pal envoltoriu de los regalos". Ello ye que "Munchos comercios entruguen pola posibilidá d'adquirir más material, sobremanera de cara a la campaña de Navidá". Por de pronto yá se lleven repartíes más de 4.000 de bolses col eslogan de la campaña y 6.000 pegatines pal envoltoriu de los regalos con frases tipu "préstame que te preste" o "esti regalu ye pa ti porque yes lo meyor" amás de 9.000 trípticos col vocabulariu de los productos que se puen mercar, cerca de 400 Blocks de notes con un completu pallabreru pa facer los recaos
n'asturianu y un pequeñu vocabulariu con formulismos n'asturianu pa qu'el comerciante se dirixa al cliente, con frases del tipu "¿Puedo ayudalu en daqué?" "¿Envuélvo-ylo pa regalu?" o "Tome'l vueltu".