La ocupación de cames na rede hospitalaria ye del 72,8 por cientu

|

El martes rexistráronse 186 contaxos, con una tasa de positividá del 4,13 por cientu.

La Conseyería de Salú informó que la ocupación total de les cames hospitalaries, incuyendo tanto pacientes COVID-19 como d'otres patoloxíes, ye anguaño del 72,8 por cientu, mentes que nes UCI'l porcentaxe asítiase nun 34,2 por cientu. Ayeri tornaron a aumentar los ingresos en planta, 13, que ponen el total en 260, mentes qu'en cuidaos intensivos siguen 39 pacientes.

Los datos oficiales de la pandemia dexaron na xornada 188 casos, 186 más 2 de díes anteriores, que ponen el total de la serie en 8.841. Fixéronse 4.501 pruebes PCR, récor hasta la fecha, polo que la tasa de positividá asitióse perbaxo del 5 por cientu, con un 4,13 por cientu, depués de cuatro xornaes superando la barrera marcada pola Organización Mundial de la Salú (OMS) pa tener controlada la situación.

Ayeri finaron cuatro homes de 96, 89, 82 y 70 años, a los qu'hai que sumar una muerte non cuantificada d'un día previu. Asina, dende l'entamu del andanciu hai que llamentar la perda de 383 persones nel país.

Otra manera, 6 afeutaos pol coronavirus SARS-CoV-2 recibieron l'alta epidemiolóxica, polo que'l númberu total de curaciones queda en 2.360.

32 biltos activos

Como cada miércoles, Salú treslladó al Ministeriu de Sanidá'l númberu de biltos activos n'Asturies. Anguaño hai 32, 8 más qu'hai una selmana (24) y 10 qu'hai dos (22).

D'ellos, 18 detectáronse nestos 8 díes, de los que 11 tán venceyaos con residencies de mayores, 6 con establecimientos hosteleros, 4 con centros educativos y 3 con hospitales. El restu de los focos tienen que ver col ámbitu llaboral, social o mestu.

Contador Estadistiques