La Noite Celta de Porcía torna a enllenar de folk el Campo del Alameda

Depués de dos años d’obligáu parón, la decana de les nueches celtes del país torna al calendariu. La Noite Celta de Porcía, que nel 2019 celebró la so trentena sesta edición, vive esti sábadu la so trentena octava cola presencia de la Banda de Gaitas El Trasno, Baxel, La Tarrancha, Felpeyu y Llan de Cubel.

Diba ser la del 2020 la trentena sétima, marcada pola perda d’Elías García, pero ésta nun pudo entamase poles restricciones marcaes pa enfrentar la pandemia de COVID-19. Pero pa esti retornu al Campo del Alameda va caltenese la mayor parte d’aquel cartelu previstu, col cambiu únicu de Tuenda.

Asina van tar La Tarrancha, Felpeyu y Llan de Cubel, a los que se sumen la Bada de Gaitas El Trasno y Baxel. Una alineación de luxu asturiana dafechu col que la organización de la Noite Celta de Porcía devuelve l’atmósfera especial a esti llugar del conceyo d’El Franco qu’atrái a públicu de tol país y d’otros llugares a disfutar de la meyor música folk.

Les actuaciones van principiar a les 22.30 hores nel Campo del Alameda, onde nun van faltar les sardines pa garrar fuercies pal baille que prepara l’Asociación Cultural Alameda.

Na semeya, El Río Porcía al so pasu pel Campo del Alameda.