La música y internet van ser los temes d'unes xornaes en Mieres

El colectivu mierense"eXg" entama unes xornaes en Mieres nes que va falase de como afecten les nueves tecnoloxíes, principalmente internet, al mundu de la música. Ellí van dar la so opinión xente como Carlos Redondo, Pedro Vigil, Cesar Rendueles o Xabiel García Pañeda, acompañándose los debates d'actuaciones de grupos como "Lego my ego" o "Stoned Atmosphere".

"eXg" ye un colectivu de Mieres que lleven alantre Ernesto Avelino Suárez y otros rapazos de la villa que consideren que "Mieres tien un impresionante potencial creativu desaprovecháu. Tamos dispuestos y dispuestes a facer la nuestra aportación pa que, xunto con otres iniciatives que yá tán en marcha, volvamos creer en nós mesmos, a ser una referencia en toa Asturies, nel planu cultural y artísticu, na estaya del compromisu social y comunitariu." Con esta filosofía por bandera l'asociación lleva alantre delles actividaes, ente les que tán estes xornaes que cuente cola collaboración na organización de MIAS, la organización xuvenil d'Izquierda Asturiana (IAS).

Les xornaes, que van desenvolvese el 25 y 26 d'esti mes, va centrase n'analizar como afecta'l desarrollu de nueves tecnoloxíes, especialmente internet, nel complicáu mundu de la música, tantu dende un puntu de vista técnicu como sociopolíticu. El sábadu 26 d'esti mes, nel centru de cultura Caxastur de Mieres a partir de les 17:00 hores, va haber trés charres y una mesa redonda. La primer charra va ser de Cesar Rendueles, miembru del colectivu madrileñu "Ladinamo" y investigador de la "Universidad Complutense" qu'anguaño ye director de publicaciones del "Círculo de Bellas Artes" de Madrid. Baxo'l títulu "Copiar, robar, mandar", Rendueles va falar de como les lleis del copyright coarten la propiedá intelectual, y va apurrinos la so visión sobre la concentración mercantil de los medios de comunicación.

Nun aspectu más técnicu, a les 17:30, Xabiel García Pañeda va falar sobre Intercambiu d'archivos P2P. Ye dicir, de cómo funcionen les redes Peer to Peer, que s'empleguen de forma masiva pal intercambiu d'archivos de toa triba, especialmente d'audio y vídeo. Xabiel ye profesor de la Universidá d'Uviéu especialista n'audio y vídeo y anguaño ye l'únicu miembru d'una universidá del estáu español perteneciente al consorciu internacional W3C. P'acabar a les 18:00 hores, va tar Luis Rodríguez falando sobre Formatos d'Archivos d'Audio, dende la perspectiva de les ventayes de la llibre distribución y los formatos de códigu abiertu. Luis Rodríguez, informáticu de profesión, ye presidente d'Asturlinux, y ye ún de los defensores n'Asturies del usu de software llibre.

Darréu de les charres, a les 20:00 hores, va entamar una mesa redonda con títulu de "Musica na rede". La mesa, va moderala Estela Aparisi, integrante del grupu femenín d'electro- rock "Subbuteo" y DJ baxo'l nomatu "Rayito", amás de periodista. Na mesa va tar tamién Pedro Vigil, una de les referencies del pop asturianu dende los años 90 abarcando la so carrera de músicu, qu'entamó colos desapaecíos "Penélope Trip" a grupos como Edwin Moses, amás de la so carrera en solitario. Como productor, Vigil encargóse de los discos de Nosotrash o Pedru Pereira, siendo anguaño responsable de los locales d'ensayu pa músicos del Conceyu de Xixón. Otru de los participantes na mesa ye Fran Carrio (Arma X), miembru de "Stoned Atmosphere", grupu participante nes xornaes. Pablo Souto, miembru de "Skanda" , una de les bandes más conocíes de la escena mierense, y acabante ganar el premiu al meyor cantar asturianu de 2004 convocáu por Asturies.com, va tar tamién nesta mesa que se completa cola presencia de Carlos Redondo, perconocíu músicu asturianu qu'anguaño ye parte del grupu de folk "Felpeyu", y qu'axunta esta actividá col so trabayu al frente del sellu "Tierra Discos".

El vienres 25, como adelantu de les xornaes va haber un conciertu en Mieres con dos grupos y una DJ. A les 20:00 hores na cúpula de Mieres (na parte de dientro), va xubir al escenariu "Stoned Atmosphere", dúu de Hip-Hop orixinariu de Blimea y Villa. Los Stoned Atmospher son una de les revelaciones na música asturiana, llamando l'atención el fechu de que tola so popularidá añera n'internet en cuantes que, anque nun tienen entovía nengún discu espublizáu, les sos maquetes descárguense masivamente na rede, sobremanera'l so últimu trabayu "Issue 3". Darréu d'ellos va tocar "Lego my ego", tamién asturianos, finalistes y premiaos nel concursu de hip-hop Villa de Bilbao, axunten una apreciable cifra d'apariciones en público dientro y fuera d'Asturies, gastando un Hip -Hop más eclécticu y un desarrollu instrumental variáu. P'acabar va tar "DJ Rayito", moza uvieina que sabe axuntar tolos sos conocimientos musicales, dende los académicos hasta los más "informales", para ufiertar unes sesiones que siempre son un inescaecible repasu históricu-sentimental, col baille por montera. La entrada al conciertu val trés euros con una consumición incluyida.