La música en vivo va volver a los chigres d'Asturies

|

El gobiernu asturianu va cambiar la llei que torga esta posibilidá, según informó a los colectivos que refuguen la prohibición

Nesti momentu la música en directo ye illegal en tolos bares d'Asturies, anque los locales tean insonorizaos y tengan llicencia pa música amplificada.

Esta prohibición ye la consencuencia de Llei d'Espectáculos Públicos y Actividades Recreatives del Principáu d'Asturies, na que nun se contempla'l papel de los chigres como axente cultural y la so importancia pal desarrollu de la música en directo.

Dende hai meses existe un movimientu organizáu nun primer momentu a traviés de les redes sociales que pide un cambiu na llei pa que nun se discrimine nin persiga a los músicos y la música en directo y qu'un bar con  llicencia pa música amplificada pueda emitir música dientro de los llímites de la so llicencia, independientemente de si la música ye en vivo o nun lo ye.

Compromisu de cambiu na llei

Según Frank Delgado, xerente de la cervecería Ca Beleño, y ún de los cabeces visibles del movimientu a favor del cambiu, el colectivu tien el compromisu del gobiernu asturianu, y l'apoyu de tolos grupos representaos na Xunta Xeneral, pa llevar a cabu un cambiu de la llei nel primer trimestre de 2016.

Contador Estadistiques