La música en San Xuan

La nueche del 23 de xunu enllénase de música folk per toa Asturies, estos son los conciertos más importantes.

En Xixón el Conceyu nun s'espurrió muncho preparando'l programa, y la cosa va quedar en que a les 21:00h les bandes de gaites "Noega" y "Villa de Xixón" van facer unos pasucais pela ciudá hasta la playa poniente, llugar onde va tar instaláu l'escenariu del conciertu principal. Ellí va actuar la "Oysterband". La banda, con un estilu averáu al de los míticos "The Pogues" van entamar a eso de les 23:00 hores, con una parada a les 00:00 la nueche pa dexar que se prenda la foguera y siguir col conciertu en prendía la foguera y los fueos artificales.

En Corvera siguen col emponderable vezu de facer la nueche de San Xuan más grande d'Asturies. Dende pela tarde, bien ceo, entamen les actividaes con xuegos populares y animación infantil, anque lo gorde entama a les 20:00 hores cuando van actuar el grupu de baille "Trebolgu" y va facese'l "IV Concursu de Glayos de Protesta". A les 23:00 hores va entamar lo que ye talamente la nueche folk cola actuación de "Dixebra", qu'acabaran a les doce pa prender la foguera. El fueu va traer l'actuación d'interpretes de canción asturiana y el conciertu, sobre la 1:00, de "Tejedor". Pa les 2:00 ta previsto que tean nel escenariu los escoceses Allan y Jhon Kelly y Arty McGlynn, toos ellos miembros del grupu "Mosaïc". Pa zarrar la nueche van tar "Texu".

Uviéu tamién presenta un cartel enforma interesante pa que tengamos onde escoyer pa esa nueche. La folixa entama a les 20:30 de la tarde cola actuación de grupos folclóricos nes places del centru de la ciudá, ente los grupos participantes van tar "Trasgu", "San Esteban de las Cruces", "Noceo" y "La Inmaculada". Pa les 9 de la nueche va actuar na plaza de la Catedral el gaiteru finalista del memorial "Remis Ovalle". Darréu "Xuacu Amieva" va presentar el so últimu discu "Al son del fueu", acompañáu de varios músicos y la Banda de Gaites Naranco. A les 11 de la nueche va haber un espectáculu de teatru de cai con pirotécnica sobre l'agua y el fueu que desenvolverá'l grupu de teatru "Margen". En prendiendo la foguera y tres del baille de la danza prima, va actuar "Felpeyu", na que va ser la primer actuación del grupu depués de presentar oficialmente'l so últimu discu "Yá!". Los xixoneses ya tienen prevista una una presentación del discu en Xixón pa esti mes.

P'acabar, y pa los nuestros llectores qu'anden pel occidente, a les 22:00 da nueite van actuar "La bandina'l tombo" en Grandas de Salime.