La música en directo toma Avilés

"Loquillo y los Trogloditas", "Mago de Oz" o
"Fe de Ratas" son dalgunes de les bandes que van tocar
n'Avilés nun ciclu de conciertos que va ocupar el primer cuatrimestre
del añu qu'entra.



Cerveces Mahou, la discográfica Santo Grial y la promotora del
festival Derrame Rock son los responsables d'esta iniciativa, que como
esplicaba Enrique Granda representante de
Santo Grial na
mañana d'ayeri na presentación nos locales de la SGAE
d'Uviéu, tien "l'oxetivu de crear el vezu na xente de dir a ver la
música en directo". D'esta manera tán previstos na sala
Quatro conciertos de bandes de tol Estáu del panorama rock, pop, hip-hop
y hardcore. El calendariu de conciertos y los grupos de los mesmos son los que
vienen darréu, "Saratoga" (28 de xineru); "Loquillo y los
Trogloditas" (29 de xineru); "Mago de Oz" (18 de febreru);
"Habeas corpus" (4 de marzu); "Boicot" y
"Disidencia"" (11 de marzu); "Fangoria" (1 d'abril);
"Fe de ratas" (8 d'abril); "Revólver" (15 d'abril),
y el 6 de mayu'l hip hop de "SFDK".



Esta iniciativa que naz col nome de "Conciertos cinco
estrellas", tuvo a puntu de dir a Uviéu pero "la inesistencia
de locales pa este tipu d'actuaciones na capital fizo que tuviéremos que
llevanos la música p'Avilés". Asina Granda recordó la
polémica, qu'entá sigue viva, polos problemes que pon el Conceyu
d'Uviéu a los locales que quieren programar música en directo.
Esta actitú de la corporación carbayona fizo que naciera un
movimientu de protesta de músicos y espectadores, que col nome de
"Oviedo no suena",
protagonizó esti branu una riestra d'actividaes de protesta.



Otra manera, Enrique Granda tamién aprovechó pa presentar
estos conciertos como una especie d'antoxana del
Derrame
Rock de 2005. El Derrame cumple con esta edición diez años y
va volver a Pravia como na pasada edición nos primeros díes del
mes de xunetu, amás, por mor del so cumpleaños, Granda
adelantó que'l próximo" va tener dalgo más de
conteníu cultural con charres, esposiciones, foros...etc."