La música a debate en Xixón

La oficina de mocedá de Xixón y el Conseyu de la Mocedá de Xixón entamen unes xornaes sobre Visiones de l'actualidá musical. A parte de les charres y los coloquios van haber dos conciertos, Andreas Prittwitz xunta José Antonio Ramos y Kiko Veneno.

Dende'l 17 hasta'l día 19 d'avientu va debatise en Xixón dellos aspectos de la música n'actualidá. A lo llargo de los trés díes van tocase los siguientes aspectos del mundu de la música, la creación, la formación, la producción y la distribución/difusión. Sobre estes cuestiones van falar distintos conferenciantes, depués de les charres van facese unes meses redondes con participantes conocedores de los aspectos a discutir . Xunta esta programación va haber dos conciertos, el vienres 17 Andreas Prittwitz y José Antonio Ramos van xuntar los sones de les flautes y saxos d'Andreas col timple, instrumentu tradicional anariu, de José Antonio. Los dos músicos va tocar los temes del so discu en conxuntu "Y", qu'espublizaron esti añu na propia casa de discos Andreas Prittwitz "Ingomúsica". Esti conciertu va ser nel conservatoriu profesional de música de Xixón a les 21:00 hores, la entrada va ser de baldre pero va haber que retirar enantes una invitación.

El sábadu 18 va tocar un auténticu veteranu del mundu de la música, Kiko Veneno. El catalán sufrió nes sos propios carnes lo bueno pero tamién muncho de lo malo de la industria musical cuando tuvo problemes cola que yera la so discográfica. Kiko va tocar na sala Albéniz a les 21:30 hores y la entrada va costar 15 euros anticipada y 18 na ventanuca. Los que s'apunten a les xornaes van tener les dos entraes pa los conciertos, namás que van tener que pagar los 25 euros d'inscripción. Pa saber más detalles del programa de les charres, horarios y como apuntase convidamos a los nuesos llectores a visitar la páxina web de les xornaes.