La mina d’oru de Tapia afuracaría un cráter de 600 metros

Dende mediaos del añu pasáu sábese de la esistencia d'un proyectu por parte de la empresa multinacional de capital canadiense Río Narcea Gold Mines p'abrir una mina d'oru en conceyu de Tapia. Según les cuentes qu'echa Río Narcea, titular de les mines d'oru de Boinás y Carl.lés, nos conceyos de Cagas y Miranda, Salave guarda unes reserves de cerca d'un millón y mediu d'onces d'oru. La empresa tien pa ella que la reserva aurífera d'Os llagos de Silva daría pa una campaña de dellos años d'esplotación (anguaño salen de les esplotaciones de Boinás y Carl.lés cerca de 175.000 onces al añu, colo qu'a un ritmu asemeyáu Salave tendría material pa cerca de diez años). Según los estudios de la compañía, la capa de mineral más interesante asítiase n'horizontal ente 200 y 250 metros baxo'l suelu y presenta una concentración d'oru mui alta, d'ente 8 y 8,6 gramos d'oru por tonelada de tierra.

Casu de salir alantre'l proyectu, un diba ser la primer vegada que les máquines afuracaren el subsuelu de Salave. Esta antigua mina d'oru que s'esplotare en tiempu de los romanos foi tamién nos años 40 del sieglu XX fonte de Molibdenu, y dende 1970 hai estudios sobre la viabilidá d'una reapertura que se convertieron en realidá al espropiar nel añu 1989 l'Estáu'l terrenu como futura esplotación minera. La superficie total de la reserva mineral alcanza les 433 hectárees.

Agora, los planes de la empresa pa Salave tan pasando los trámites preliminares d'información pública, trámites qu'aprovechó la Coordinadora Ecoloxista d'Asturies pa manifestar la so refuga total al proyectu y solicitar que l'alministración autonómica lu desestime. El grupu conservacionista describe acordies al proyectu de la empresa les dimensiones del proyectu de Salave, que supondría la creación d'una mina a cielu abierto na mesma costa del conceyu. Esta mina tendría'l so centru d'operaciones nun cráter de 600 metros de diámetru (sobre 28 hectárees de superficie) y qu'afuracaría'l suelu hasta llegar a esos 200 metros abondantes nos que s'asitia la capa de mineral bono. Xunta ello, la mina precisaría tamién d'un "área de serviciu" na que dir poniendo tolos servicios auxiliares de la mesma, qu'incluyen una escombrera d'ente 120-180 hectárees y la planta de tratamientu de mineral, que pue tomar sobre otros 30.000 metros cuadraos.

Los ecoloxistes sorrayen l'altu valor cultural y paisaxísticu d'Os llagos da Silva, que s'asitien talamente na rasa costera, a unos 200 m al Oeste de la playa del Figo y cerca de 2.000 m al Este de Tapia, y remembren que l'actividá minera nesta zona ye incompatible dafechu cola actual normativa urbanística y d'ordenación del territoriu, atacando les Directrices Subrexonales d'Ordenación del Territoriu pa la Costa y el más de recién Plan d'Ordenación del Litoral d'Asturies (POLA).

Poles dimensiones y allugamientu del proyectu, los ecoloxistes albidren un "impactu severo o críticu" no tocante a paisaxe, amás d'impactos severos na población humana y animal, con índices altos de ruíu, polvu en suspensión y tráficu pesao, ente otres consecuencies, amás de la ruina de l'agricultura en tola redolada de la mina. Nel so escritu, los ecoloxistes denuncien que los daños sobre la calidá de vida humana puen afectar, y muncho, al turismu que visita Tapia, Mántaras y Salave.

El tratamientu del mineral que saliere de Salave esmolez a los ecoloxistes, qu'entienden que cuando se dio de pasu nel añu 1996 la instalación de Río Narcea en Cangas del Narcea, onde esiste una planta de tratamientu del mineral por cianuración, suponíase qu'esa planta namás diba a tratar el mineral de Boinás y de Carl.lés, colo que la llegada de más mineral d'otres esplotaciones fadría más peligrosa pal mediu ambiente la balsa d'estériles d'esta planta, asitiada nel cursu altu del Narcea. Más irónicos son los ecoloxistes asturianos cola propuesta de la empresa de restaurar el furacu que diba quedar n'escosando l'oru de la mina como un llagu con puertu deportivu, que nun dulden en calificar de "sorprendente".