La mina d’oru de Salave llega a la prensa internacional

"Ye como en cualquier otru llugar, siempre hai quien s'opón, ello forma parte del procesu". Con estes palabres resumía John Hick al periódicu Toronto Star el presidente executivu de la multinacional del Canadá Río Narcea Gold Mines (RNGM) la situación actual en Salave, conceyu de Tapia, onde la empresa que yá esplota les mines a cielu abierto de Carllés y Boinás nel suroccidente asturianu, quier abrir una mina a cielu abierto que traería con ella un crater de cerca de 400 metros de diámetru y más de 200 de fondu a menos de 100 metros de la costa asturiana.


Nun artículu en que se recueyen los principales puntos de vista del director executivu de la RNGM y que s'espublizó esti domingu, el Toronto Star afirma que la oposición popular nun asusta a los directivos de la multinacional minera, una tranquilidá que pa los empresarios mineros reposa na bona rellación que tienen col executivu asturianu. Según declaró Hick al Toronto Star "Esta provincia yá nos dio permisos pa les otres mines va ocho años. Conócennos y saben del nuestru llabor". Hick, que-yos quita chapeta a les declaraciones de los grupos ecoloxistes argumentando que la empresa comprométese a reforestar y recuperar la zona de la esplotación, diz tamién que nun ye como si se fuere a facer una mina na playa, y anque aclaria qu'entovía tienen qu'apautar con estudios de viabilidá si la mina ye económicamente posible, diz darréu d'ello que de pintar bien los estudios, el furacu podría abrise pa últimos del 2007. Ye bien fácil que John Hick nun tuviere conocimientu nel momentu de la entrevista de les últimes declaraciones del presidente asturianu Vicente Álvarez Areces, que declaróque la mina en Salave diba contra tola llegalidá vixente y nun podía aprebase.


D'otra manera, el casu de la mina d'oru asturiana ta repercutiendo tamién n'Inglaterra, onde'l Guardian, ún de los periódicos de mayor tirada, dedicó-y el sábadu un reportaxe al proyectu de RNGM en Tapia. Si'l diariu del Canadá se centraba nel puntu de vista de la empresa, el Guardian salta al otru llau de la raya y recueye'l puntu de vista de vecinos y ecoloxistes, sorrayando l'espoxigue que ta viviendo l'occidente astur gracies al turismu y como la mina podría tarazar esi desarrollu.

Más información nos artículos deGuardian y Toronto Star (pide soscripción)