La militancia de la XDLA celebró’l recibimientu del postrer Andrés Solar, al que recuerda “en cada actividá”

La familia d’Andrés Solar y la militancia de la Xunta pola Defensa de la Llingua Asturiana (XDLA) aconceyaron un añu más pa la entrega del premiu que lleva’l nome del de Deva. Esta ocasión foi nun ámbitu priváu pa celebrar la última edición del gallardón, que se dedicó a tolos activistes que collaboraron nestos cuasi 40 años de vida del coleutivu.

“Non por eso vamos escaecer a Andrés, porque’l so recuerdu, anque munchos y munches nun lu conociéremos, sigue en cada actu militante que faigamos, en cada actividá, en cada denuncia, en cada manifestación pola oficialidá...”, apuntó la XDLA nel discursu de los XXXVIII Premios Andrés Solar”. La próxima, la del Día de les Lletres Asturianes, que, como vien asocediendo estos años, entámase’l día siguiente, sábadu, el 6 de mayu.

La sidrería xixonesa Canteli foi’l llugar onde esti sábadu tuvo llugar una espicha de celebración al que taba convidada tola militancia, actual y pasada, de la XDLA. Tamién Lali Solar, hermana d’Andrés, xunto col so maríu Jesús, siempre presentes nes gales d’entrega del Pegollu y la Madreña de Purpurina, antipremiu que se dexó de dar nel 2021, cuando “empezaba a resultanos fadio siguir falando d’ellos cuando nos víemos nos Andrés Solar”, en referencia a los enemigos del idioma.

“Tamos equí pa celebrar la última edición de los premios que llevaron el so nome y que se crearon pa recordalu. Foi él, a títulu póstumu, quien recibió’l primer pegollu, en 1985. D’entós p’acá, pasaron 37 ediciones nes que tentemos de siguir la regla non escrita de nun premiar a los que tábemos implicaos directamente na reivindicación llingüística. Ye verdá que non siempre fomos quién a ello porque hubo años duros (sábenlo bien los más vieyos) en que nun había muncho onde premiar”, arrancó’l discursu, que s’encargó de lleer María Xosé Martínez, presidenta de la XDLA.

“Nestes últimes décades, a partir de la figura d’Andrés Solar hubo homenaxes, ediciones póstumes, Selmanes de les Lletres, discos y, dende hai dos años, un premiu lliterariu instituyíu pol Conceyu de Xixón que lleva’l so nome. Les empreses qu’usen l’asturianu son cada vez más y yá ta anunciada la creación d’un distintivu institucional, Alfaya, pa reconoceles públicamente. Llevábemos un tiempu dándo-y vueltes a la idea de zarrar el ciclu d’estos premios. Paeciónos qu’anguaño yera’l momentu”, siguió la intervención, na que nun faltón un recuerdu pa los ausentes Xesús, Yolanda y Xuan. “Si Andrés, de la primer fornada de militantes, abrió los premios, qué meyor que zarralos premiando simbólicamente col Pegollu a tola xente que foi militante en dalgún momentu de la historia, llarga, de la Xunta”, añadióse.

En definitiva, esti XXXVIII Premiu Andrés Solar ye “un reconocimientu a tola xente de la Xunta, porque tol mundu foi y sigue siendo necesariu pa que la reivindicación siga viva”. “Sí, los avances y los derechos nun vienen solos, nun caen d’un ñeru pega. Pa que’l pesu social del asturianu medrara, fixeron falta escritores, maestros y maestres, músicos y músiques, periodistes, empresarios, pero tamién tola ciudadanía, caún y caúna de nós falándolo, escribiéndolo. Y la espresión social de too eso precisa estructures organizatives que propongan, que denuncien, que faigan acciones reivindicatives pa que se llogren los derechos llingüísticos, pa que se llogre esa oficialidá que ye pasu necesariu pero que nun ye abondo pa garantizar la so sobrevivencia. Cantar n’asturianu, escribir n’asturianu o enseñar l’asturianu ye perimportante, pero cambiar el marcu xurídicu de la llingua precisa d’acciones sociopolítiques que presionen nesa dirección p’algamalo”, pudieron sentir tamién los presentes, que compartieron alderiques y recuerdos ente comida y sidra col convencimientu de que “la llucha y la reivindicación siguen”.