La militancia d'Aína va decidir la postura del partíu énte les Europees

La formación asturianista celebra na Casa la Cultura de Llanera la so III Asamblea Nacional.

El 9 de xunu celébrense eleiciones al Parllamentu européu y Aína va volver consultar a la militancia, como fixo pa les Nacionales y Estatales, la postura que tome la formación de cara a esta cita nueva coles urnes. Pa ello convoca pa mañana a les 9.30 hores en La Estación.

La III Asamblea Nacional va desenvolvese baxo'l nome de 'Y toes en movimientu' y va tratar otros munchos temes. Asina, va aldericase al rodiu la organización interna y de los pasos próximos a tomar nel procesu de cremientu del partíu, y va presentase'l Secretariáu d'Aína, "órganu de dirección que va tar formáu por dos portavoces y dos coordinadores col enfotu de reforzar la imaxe pública del partíu y de consolidar el so funcionamientu internu".

Dos comisiones nueves

La formación sigue apostando pola creación de comisiones de trabayu en pequeños grupos abiertos a l’afiliación. Les dos últimes que van formase son una dedicada a la combustión de residuos y otra a la especialidá docente de Llingua Asturiana y Gallego-asturiano.

Sobre esta cuestión última, la previsión ye "apurrir un informe fonderu sobre la cuestión partiendo d’un analís en comuña que plantegue información y soluciones pa esti alderique".

Na semeya, militantes y simpatizantes d'Aína na manifestación del 8-M celebrada en Llangréu.