La mediación de la Federación y el Conceyu dan aire al CD San Martín

El CD San Martín presentóse al so partíu correspondiente a la xornada 25 de preferente pese a la negativa inicial del so presidente, Jesús González Hevia. La mediación de la Federación y el Conceyu dan aire al club de Sotrondio.
 
El vienres pasáu, González Hevia acudió a la sede de la Federación de Fútbol del Principáu d’Asturies pa presentar la baxa del equipu na competición, trámite que nun se llegó a oficializar al tar aconceyáu nesi mesmu momentu en Samartín del Rei Aurelio’l presidente de la territorial, Maximino Martínez, col alcalde, Enrique Fernández, y la conceyala de Deportes, Gema Suárez. Nella, Martínez apostaba por dexar el tema económicu nun segundu planu cola fin de garantizar la viabilidá del club sotrondín. Asina, la Federación tramitó la ficha del téunicu nuevu del equipu, Juanjo Corujo, motivu qu’abrió la crisis del San Martin, y dende’l Conceyu comprometiéronse a trabayar pa buscar persones dispueste a facese cargu del equipu. Una decisión que nun-y paeció prestar al presidente actual del club, qu’esa mesma tarde impidió a la plantiya acceder a les instalaciones d’El Florán pa entrenase. Tampoco nun permitió que los xugadores garraren les equipaciones pa disputar el partíu del domingu contra l’Urraca en Posada.
 
Nun primer momentu, la Federación ufrió a los xugadores, que nun quieren abandonar el barcu, una equipación pal partíu progamáu’l domingu nel campu La Corredoria, anque finalmente González Hevia entregó les equipaciones oficiales del club pal choque. Nél, l’Urraca, na so llucha pol ascensu a Tercera División, llevóse’l trunfu por 3-1, lo que mantién a los llaniscos igualaos col tercer clasificáu, el Siero, equipu que marca l’ascensu, y L’Entregu, anque con un partíu menos qu’estos dos conxuntos. Mentes, el San Martín entra en descensu tres la victoria del Campumanes por 1-0 a un Roces que ve perder gran parte de les sos opciones d’ascensu. Los de Sotrondio tán a un puntu de la salvación.