La marea negra mató una toliña

Esti fin de selmana, la marea negra dexaba otra carga de fuel en más de 60 playes del país, qu'amanecieron otra vegada estraes del galipote menudo al que desgraciadamente yá tamos tan avezaos los humanos. Sicasí, los que nun acaben de facese al escuru elementu son los animales que viven nel mediu acuáticu. Esti vienres foi una toliña la qu'apareció muerta pol galipote na playa del Espartal, na ría de Villaviciosa. Según testigos, l'animal tuvo ellí varáu cerca de 48 hores hasta que Protección Civil vieno a encargase d'elli, un tiempu en que la marea bien pudo llevalu pa la mar.Foi esti acabante pasar un fin de selmana negru en que les playes asturianes recibieron mecíos col galipote, los restos de bien de páxaros que vienen a engordar la llista de víctimes de la marea negra, que yá pasa con muncho de les 2.000 sólo n'Asturies. Si va un mes los más de los páxaros engalipotiaos llegaben vivos a la costa, lo que-yos dexaba una oportunidá de salvase, agora lo más de lo que ta apaeciendo son páxaros muertos, y, anque la mortandá nun decae, dellos yá lleguen descompuestos tres de selmanes flotando na mar. Amás de crecer en númberu, la estadística d'especies ta cambiando cola apaición estos díes de cásique tantos draques como araos, que son con diferiencia la especie más afectada pola marea negra