La mar dio 15 tonelaes de galipote nun mes

La Delegación del Gobiernu n'Asturies dio ayeri un parte sobre la marcha del operativu que ta pañando galipote na mar. Según Delegación, los barcos que trabayen nesti llabor lleven sacao dende'l 1 de xunu cerca de 15 tonelaes de galipote, en concreto 14.843 kilos.

Dende qu'entamare la marea prieto, na costa asturiana llévense recoyíes 742,6 tonelaes de fuel.

L'equipu de barcos que ta retirando'l galipote faenlu les tres lanches "Salvamar" Rigel, Algol y Capella de la Sociedá Estatal de Salvamentu Marítimu xunta les lanches La Figar (Xunta del Puertu de Xixón), y barcos de la Cruz Encarnada de Xixón, Tapia, L.luarca, Avilés y Llastres, mientres qu'el remolcador Alonso de Chaves coordina los trabayos de los demás barcos y fai llabores de control.

Aparte d'estos barcos d'organismos oficiales, hai nel llabor pesqueros contrataos de Lluanco, Candás, L.luarca, A Veiga y As Figueiras.

En cuantes al retén d'operarios en tierra pa llimpiar playes y pedreros, Delegación anuncia que güei nes playes asturianes tan trabayando 450 operarios de la empresa estatal TRAGSA xunta 28 trabayadores que fain llabores d'hidrolimpieza en pedreros y 9 supervisores de la Demarcación de Costes.

El retén complétenlu 327 persones apuntaes al paro y que tan con contratu de los ayuntamientos afectaos.