La manifestación pol Día de les Lletres va salir el sábadu 6 al meudía

Un añu más la XDLA va reclamar la oficialidá n'Uviéu la mañana siguiente a la celebración.

Na Estación del Norte (RENFE) el sábadu 6 a les 12 hores. Ye'l llugar, día y hora na que va tener llugar la clásica manifestación pol Día de les Lletres Asturianes (vienres) que convoca la Xunta pola Defensa de la Llingua Asturiana (XDLA), que va finar na plaza la Escandalera, onde va haber intervenciones y actuaciones.

Tradicionalmente venía celebrándose enantes del actu por esta xornada de l'Academia de la Llingua Asturiana nel Teatru Campoamor a les 20.30 hores, pero los cambios vivíos pola situación sanitaria pola pandemia de COVID-19 dende'l 2020, cuando nun se pudo celebrar en fecha'l Día de les Lletres, llevó a que nel 2021 s'entamara en sábadu una concentración na plaza de la Catedral y que l'añu pasáu yá se convocara la marcha pa esti día. Esti añu la Xunta Estraordinaria de la institución va volver a la tarde del vienres, pero adelántase a les 19 hores.

"Nin mañana, nin pasao, nin pal añu que vien, nin pal otru: los derechos nun s'aplacen sine die. Y nós nun vamos quedar en casa aguardando: oficialidá yá, oficialidá xa", reclama'l coleutivu.