La Mancomunidá de la Sidra organiza un taller de llectura n’asturianu en Colunga

Hasta’l 22 de marzu va caltensese abiertu’l plazu pa formalizar la inscripción pal taller de llectura n’asturianu qu’entama la Mancomunidá de la Sidra en Colunga. Les sesiones van principiar n’abril y los participantes van lleer una obra al mes.

Esta actividá, que ta desendolcándose con ésitu en Nava y Villaviciosa, llega agora a Colunga. Ye de baldre y consiste nuna llectura mensual d’una obra lliteraria n’asturianu y na celebración d’un alcuentru colos sos autores. Asina, pelos otros conceyos yá pasaron autores de la calidá de Vanessa Gutiérrez, Xandru Fernández o Miguel Rojo. Una bona manera d’avezase a lleer n’asturianu y de conocer dalgunes de les obres actuales más importantes de la nuesa lliteratura, asina como a los sos creadores.

La Mancomunidá de la Sidra entama esta actividá en collaboración col Área de Cultura del Conceyu de Colunga y la Biblioteca Municipal. Les persones en participar nestos talleres han de formalizar la so inscripción enantes del día 22 de marzu na Casa Cultura o na propia biblioteca, n’horariu de 10 a 14 hores y de 17 a 20 hores. Tamién se pue facer per teléfono nos númberos siguentes: 985.718.413 (Serviciu de Normalización Llingüística de la Mancomunidá de la Sidra), 661.604.627 (Área de Cultura del Conceyu de Colunga) y 985.852.154 (Biblioteca Municipal).