La Madreña acueye una xornada alredor de la música asturiana

Xunta Moza entama esti vienres una xornada alredor de la música asturiana nel CSOA La Madreña. El gaiteru y musicólogu Llorián García va dar un charra, pa depués dar pasu a un conciertu del grupu de pandereteros Cantaruxare.

“Trátase d’una xornada na que pue asistir tola xente que quiera deprender un poco más sobre la música asturiana y sobre les propuestes nueves de renovación y análisis que se tán faciendo anguaño”, espliquen dende la estaya xuvenil de la Xunta pola Defensa de la Llingua Asturiana. D’esta forma, la organización pretende dar a conocer un poco más la cultura y la llingua asturiana, yá que les dos van xuníes.

L’actividá va principiar a les 20.30 hores con una charra de Llorián García que toma como base la so tesina ‘Gaiteres y pandereteros: xéneru y tresxéneru na música tradicional asturiana’. Asina, “va esplicar na conferencia les últimes teoríes sobre sexualidá y música contemporánea y va esponer al públicu’l so estudiu teóricu aplicáu a la tradición asturiana, centráu nos dos instrumentos fundamentales del país: les gaites y les panderetes”, espliquen dende la organización. Darréu, Cantaruxare, grupu formáu polos percusionistes Xosé Antón Fernández ‘Ambás’, Paulino Santirso, Ramsés Ilesies y Diego Casado, van dar un conciertu de música tradicional asturiana.