La llotería de renovar el DNI col topónimu oficial

Esta selmana, na que Xicu Ilesies recurría la resolución que-y negaba adecuar el so nome y apellíu a la grafía y ortografía asturiana, conocíase otru casu de discriminación llingüística, en concreto pa incorporar nel DNI la toponimia oficial revisada del llugar. Un trámite cenciellu que munches vegaes ye una llotería pola arbitrariedá del funcionariu de turnu, creando situaciones incómodes pal ciudadanu.

“Puedo cambiatelo nun sitiu, pero non nel otru porque nun me dexa’l sistema”, “eso nun se pue facer” o “ah, eso del bable” son dalgunes respuestes que pudimos sentir munchos a la hora de solicitar la presencia de la toponimia oficial nel nuesu carné d’identidá –lo que tamién permite que salga por defeutu nel pasaporte–. Una situación más habitual nel pasáu que, poco a poco, paez tar iguándose, pero qu’entovía dexa casos de discriminación.

L’últimu diose esta mesma selmana, el martes. L’usuariu de Twitter @repunanton amosaba la so “rabia” a la salida de la Comisaría de la Policía Nacional de Xixón asitiada n’El Natahoyo “al refugar l'usu del topónimu oficial del mi pueblu y tenelu agora namás en castellán pesie a llevar más de 10 años oficial n'asturianu”, etiquetando nel mensaxe al presidente Adrián Barbón.

En concreto solicitaba que nel apartáu del so domiciliu figurara Les Vegues, topónimu tradicional de la población corverana que dende’l 2007 cuenta cola denominación billingüe ‘Las Vegas/Les Vegues’, pa lo qu’acudió con un certificáu del Institutu Nacional d’Estadística y tamién d’empadronamientu col topónimu ‘Les Vegues’. “Reclamo l'usu del topónimu n'asturianu o en tou casu l'oficial billingüe, pero la persona dizme que namás apaez el topónimu en castellán y que nun pue facer otra cosa”, lo que lleva a un discusión y a ponese en contautu per una aplicación de mensaxería direuta con Iniciativa pol Asturianu pa recibir asesoramientu.

Esta organización llama al afeutáu y entama una conversación col manes llibre, lo que lleva a la persona encargada de la tramitación a llamar a una compañera. “De sópitu atopa'l topónimu n'asturianu ¡Meca! ¡Entós yá ta!, pensé. ¡Pues non! Agora resulta que xustamente el topónimu n'ast nun se pue escoyer porque'l programa nun dexa. ¿Pero nun diximos que si apaez sí se pue escoyer?”, rellata.

Dada la situación, y al negase-y un escritu nel que s’esplique’l motivu de la imposibilidá, solicita una fueya de reclamaciones, procesu que nun pudo completar al nun haber yá naide n’Información por ser última hora, y vese obligáu a marchar con un DNI que nun respeta la toponimia oficial del so llugar de residencia al incluyir un nome de llugar derogáu como ye ‘Las Vegas’. Dalgo grave al tratase d’un documentu oficial qu’ha respetar la llegalidá vixente.

Reclamaciones a Delegación y el Defensor del Pueblu

Tres la problemática del ciudadanu, Iniciativa pol Asturianu presentó reclamaciones énte Delegación de Gobiernu y énte’l Defensor del Pueblu desplicando'l casu y reclamó nel escritu “l’actualización de les bases de datos pal usu de la toponimia oficial a toles instancies, de manera que les lleis autonómiques seyan respetaes y que nengún ciudadanu seya discrimináu pol usu de los topónimos tradicionales, equiparándose al restu de ciudadanos del conxuntu d’España”. L’asociación considera que “nesa adaptación a los Decretos de Toponimia de los Conceyos, sería lóxico que los nomes de llugar salgan de forma automática na aplicación informática y nun dependan del pidimientu del ciudadanu pa llevalos n'asturianu, como asocede agora”.

Y ye que, en tolos casos, ye necesario que sía’l ciudadanu’l que pida espresamente’l cambiu pa que se proceda a actualizar el documentu. Un trámite cenciellu pero que munches vegaes ye una llotería pola disposición del funcionariu pa ello, creando momentos incómodes en dalgunos casos pa la persona qu’acude a renovar o dando llugar a situaciones discriminatories como la que vivió esti vecín de Les Vegues n’El Natahoyo.