La llotería de Navidá dexa premios menores n’Asturies

Una alministración de los Xardinos de la Reina en Xixón y otra de Llanes repartieron papeletes del 4º premiu, el 17.275. El gordu vendióse dafechu nuna alministración de Sort (Lleida)

Celebróse esta mañana'l tradicional sortéu de navidá de la llotería. El premiu gordu, que reparte 2 millones d'euros por billete y 200.000 euros por décimu, madrugó con gana, apaeciendo a les 9 y venti de la mañana venceyáu al númberu 54.600, que se vendió dafechu n'alministración "La Bruixa d'Or" en Sort - Lleida. Esta alministración ye una de les más célebres de tol estáu, despachando gran cantidá de númberos dende qu'entamen a vendese les papeletes yá nel mes d'agostu gracies a la fama que tien l'alministración, que ye laque más viende con diferencia. Más de la metada de los décimos d'esti númberu 54.600 vendiólos l'alministración de Sort al traviés de la so páxina web, espardiendo'l premiu per munchos llugares, y ye que la Bruixa d'Or despacha al añu décimos de llotería a más de 4 millones de persones, llegando acasos como'l del añu pasáu en que tuvieron que parar de vender décimos per internet pal sortéu "del neñu" por estragase'l so sirvidor.

Asturies, otru añu más, ha conformase con premios menores. El más importante que tocó equí foi'l 4º premiu, que-y tocó al númberu 17.275, vendíu nos Xardinos de la Reina de Xixón y en Llanes, mientres que'l 5º premiu foi pal númberu 7.779, que se vendió n'alministración númberu 23 d'Uviéu
Ver equí la llista de númberos ganadores