La lliteratura de naturaleza protagoniza les ponencies virtuales 'Otres xeografíes'

|
María Esther García López en 'Otres xeografíes'

Autores n'asturianu participen nesta iniciativa de l'Asociación d'Escritores d'Asturies.

La imposibilidá d'entamar les Xornaes Lliteraries en Pravia pola situación sanitaria pola pandemia de COVID-19 llevó a esti coleutivu a organizar 'Otres xeografíes', unes ponencies virtuales sobre lliteratura de naturaleza nel que participen asociaos, autores de fuera d'Asturies y persones venceyaes cola natura con llectures d'otros escritores o creaciones propies.

La presidenta, María Esther García López, abrió la xornada con 'Delles reflexones sobre naturaleza. Fernán Coronas', na que faló sobre esti tipu de lliteratura y recitó poemes del Padre Galo. Nun foi la única intervención n'asturianu, yá que Mari Luz Pontón propunxo 'La naturaleza, un llibru abiertu' y José Ángel Gayol, 'Walden y llibertá'.

De fuera d’Asturies participaron en 'Otres xeografíes’ el gallegu Toño Núñez, con 'Adiós ríos; adiós fontes'; Isabel Blanco Ollero, de l'Asociación de Escritores de Navarra; y Mari Lluz Quiroga, de la Sociedad Cántabra de Escritores. Rescampló la presencia de ponentes venceyaos cola naturaleza, como Joaquín Araújo (Emboscado), l’inxenieru dedicáu a proyeutos espaciales y defensor de la natura, José Manuel González Estévez, y Luis Laria, presidente del CEPESMA y del Parque de la Vida, amás d’un intermediu con un poema d’Aurelio González Ovies y un conciertu de ‘koto’, entituláu ‘Sakura’ (flor de zrezal), por Yoshie Sakai, hasta sumar 16 intervenciones a lo llargo de poco más d’hora y media.

“Ye bien importante, y más nesti momentu que travesamos, nel que la Tierra se queixa, que los escitores nos faigamos ecu de la necesidá d'averanos a la naturaleza tamién al traviés de la lliteratura, teniendo en cuenta, que dende siempre la naturaleza foi pa nós recursu vivu y fonte d'inspiración”, apuntó García López.

Contador Estadistiques