La llingua asturiana posiciónase en cuartu llugar en volume de descripción d’elementos en Wikidata, la mayor base de datos llibre

L’inglés, el neerlandés, el francés y l’asturianu. Son les cuatro llingües que lideren la tabla de Wikidata, la mayor base de datos llibre, que da soporte a Wikipedia, en volume de descripción d’elementos, perriba d’otres con munchos más falantes como ye'l casu del alemán, el castellanu, l’italianu, el suecu o'l portugués.

“Wikidata ye una base de datos secundaria llibre, en collaboración y multillingüe, que recueye datos estructuraos pa sirvir d'encontu a Wikipedia, Wikimedia Commons, les otres wikis del movimientu Wikimedia, y a cualquier persona del mundu”, defínese na so web. La comunidá asturiana vien trabayando nesti proyeutu de manera altruísta, llabor que permite “allugar l’asturianu na rede, xenerar conteníu como fai cuelesquier otra llingua y que les grandes compañíes entamen a esbillar qué ye asturianu y qué non, y promover que, nes búsquedes, el conteníu sobre Asturies tea n’asturianu”, esplica Víctor Suárez, ún de los usuarios enfotaos nél.

Nun tweet, el maestru incorpora un gráficu con una tabla correspondiente al sábadu na que l’inglés ocupa la primer posición en volume de descripción d’elementos, con 77.012.933 etiquetes (un 84,5 por cientu del total), siguida del neerlandés, con 55.592.582 (61 por cientu), y del francés, con 13.501.342 (14,8 por cientu). L’asturianu apaez nel cuartu llugar, con 13.257.514 (14,5 por cientu), per delantre del alemán, con 12.769.842 (14 por cientu), y el castellanu, con 12.769.842 (13,5 por cientu).

Norabona y arguyu coleutivu

Iniciativa pol Asturianu quixo treslladar a esta comunidá públicamente la norabona por esti llabor y l’arguyu coleutivu que supón. “Gracies a esti gran trabayu la llingua asturiana ta presente na rede de tol mundu, convirtiendo al asturianu nun idioma que xenera conteníos n’Internet y con futuru, que s’alcuentra al nivel del restu de llingües del planeta”, destaca.

D’igual forma apunta que “merez el reconocimientu del movimientu de reivindicación llingüística pol esfuerzu desinteresáu y l’enfotu ‘gratis et amore’ de una montonera de persones anónimes”. “Esta xera y actitú ante l’idioma ye un exemplu pa toos y toes: primero porque s’usa l’asturianu pa falar de cualesquier tema; segundo, porque se fai ensin complexos; y tercero, porque ye una responsabilidá de toos salvar y visibilizar este idioma”, añade.