La lliga del cantábricu

Los gobiernos autonómicos d'Asturies, Galicia, Cantabria y Euskadi llegaron ayeri a un alcuerdu pa facer una lliga de traineres na que participen equipos de les cuatro comunidaes que comparten el mesmu mar. La noticia saltó ayeri n'Euskadi, onde se presentaba'l Plan Estratéxicu del Remu vascu. El plan del executivu euskaldún inclúi nos sos programes el desarrollu d'una competición d'altu nivel en remu de bancu fixu, que seya importante, dea espectáculu y albarque un gran marcu xeográficu, y la idega ye tener apautaos tolos aspectos organizativos pa primero d'acabar el mes de mayu, de manera que la lliga de traineres del cantábricu pueda entamar yá esti mesmu añu.

La iniciativa pa facer esta lliga vieno d'una relativa crisis na lliga vasca, que d'una parte ve como ta menguando'l númberu de rapacinos que se meten pel deporte del remu y d'otra parte polos problemes cola federación cántabra, que nun taba d'alcuerdu con que se llendare la participación d'equipos cántabros na lliga vasca de traineres. Pela parte d'ellos, los gallegos tamién taben pa facer una lliga propia, llegándose a la fin a un alcuerdu ente toles autonomíes pa facer una lliga conxunta.

Asturies nunca nun tuvo una lliga al estilu de la vasca, pero nel país siempre hubo tradición nel deporte del remu, que tuvo bien de popularidá a primeros del sieglu XX. Anguaño, los equipos asturianos de traineres espárdense per tola costa central y occidental, tando los más importantes en Carreño, Lluanco, Navia y, sobremanera, Castropol, onde hai un equipu al meyor nivel de competición y onde ta tamién la sede de la Federación Asturiana de Remu.