La llei de calidá pue mete-y tisoria a la educación asturiana

El sindicatu d'enseñanza SUATEA, que yá denunció esti miércoles que la Conseyería d'Educación taba entamando a aplicar la Llei de Calidá de la enseñanza n'Asturies, dio anuncia ayeri de que va entamar un ciclu d'asamblees pa dar a conocer al colectivu de trabayadores de la enseñanza'l conteníu de les reformes que l'alministración asturiana tien pensao implantar acordies cola Llei de Calidá. Suatea diz que la Conseyería, aprovechando la LlOCE quier quitar sobre 700 puestos de trabayu nel sistema educativu asturianu y echar a andar la reconversión del sistema educativu nel mediu rural. La baxada de profesoráu llevaría arreyada una eliminación de puestos de trabayu na estaya d'atención a la diversidá y tamién dañaría la escolarización del asturianu.

La organización sindical afirma que'l pasáu 14 de xineru, na Comisión de Seguimientu del Alcuerdu sobre Enseñanza Primaria, denunciare l'incumplimientu del alcuerdu por parte de la conseyería. El fechu de que l'alministración nun tenga pensao facer debate nengún sobre les midíes que cuenta con echar a andar en Claustros y Conseyos Escolares y que namás dellos centros disponen de los borradores de los decretos que van aplicase valórase mui mal dende'l sindicatu d'enseñanza, al que-y estraña que la prioridá del Gobierno asturianu en materia educativa seya la d'aplicar "primero que naide" los mandaos más retrógrados de la LlOCE. Con estes midíes, el sindicatu entiende que la Conseyería arreniega de la prioridá de la escuela pública y afala la concertada y valta la democracia nos centros col decretu sobre equipos directivos,

que va torgar dende'l cursu qu'entra que la comunidá educativa escueya'l director del centru, siendo l'alministración la que va facer directamente nesos nomamientos.