#LluchandoPolaSoberanía celebra'l primer alderique col oxetu d'avanzar nel desendolcu d' una axenda propia p'Asturies

L'ausencia d'Asturies y los sos problemes nos discursos de los principales partíos políticos lleva a #LluchandoPolaSoberanía a tomar la iniciativa y entamar la campaña 'Un pueblu en movimientu mirando al futuru' pa da-y voz al país. Esti miércoles celebra nel Llar La Llegra'l primer alderique participativu.

"La campaña 'Un pueblu en movimientu mirando al futuru' naz col enfotu de dar rempuesta a les necesidaes sociales de les asturianes tomando como puntu de partida modelos feministes, alternativos al capitalismu, y que lluchen pola soberanía del pueblu asturianu xunto con tolos pueblos del mundu", espliquen dende #LluchandoPolaSoberanía. Ésta pretende desendolcase en trés estayes: axuntar fuercies dende la izquierda, construyir alternatives soberanistes y avanzar hacia un procesu constituyente asturianu.

El primer pasu, al que tán convidaes persones a títulu individual y coleutivos, va dase esta tarde con un alderique participativu pa falar del estáu de la nación y les problemátiques qu'atopa, dende les sociales a les económiques, pasando poles medioambientales, culturales o de xéneru. El conceyu va celebrase a les 19.30 hores nel uviedín Llar La Llegra, asitiáu na cai El Postigu Baxu númberu 40.

Equí pues consultar el manifiestu 'Un pueblu en movimientu mirando al futuru', tamién en gallego-asturiano.