La licitación de la Incineradora tien siete candidates

Un total de siete uniones temporales d'empreses (UTE) solicitaron l'almisión nel procesu de licitación pal proyectu, la obra y la puesta en marcha de la incineradora.

La licitación pal proyectu entamó’l pasáu mes de payares por orden del Consorciu pa la Xestión de Residuos Sólidos d'Asturies (Coxersa). El plazu pa participar na licitación acababa ayeri martes, día 14 d'avientu.
  
En total, sumen 23 compañíes distintes, ente consultoríes, inxenieríes, industries fabricantes de bienes d'equipu, constructores y operadores con esperiencia tanto na incineración de residuos urbanos como na xeneración eléctrica dende fontes térmiques, según informó'l Principáu.
  
Xunto a les españoles (ente elles siete asturianes), destaca la presencia de delles compañíes europees y d'otres que desarrollen el so llabor nel ámbitu internacional y que tienen presencia en países de dellos continentes.
  
Coxersa entamó'l pasáu mes de payares el procesu de licitación del proyectu, obra y puesta en marcha de la planta de valorización enerxética por una cuantía de 250 millones d'euros.
  
El Consorciu recurrió a la modalidá de procedimientu acutáu con una fase d'almisión previa (que ye la fase actual) na que les empreses candidates tendrán qu'acreditar que tienen esperiencia y méritos abondo (cualificación humana y tecnolóxica, esencialmente) nel desarrollu de proyectos d'aseyemada naturaleza y envergadura.
  
En concreto, tendrán que demostrar que participaron polo menos na construcción y puesta en marcha de trés llinies o trés plantes completes de valorización enerxética de residuos.
  
Aprobar el llistáu en Xineru
Coxersa espera poder aprobar el llistáu d'almitíos nel mes de xineru. Va seer a partir d'esi momentu cuando empiecen a computar los trés meses de plazu pa la presentación de les ufiertes per parte de los candidatos, de forma que'l Consorciu confía n'axudicar la redacción del proyectu, la obra y puesta en marcha dientro d'un añu, nel mes de payares del 2011.